QR Prezidenti Nursultan Nazarbaev Syrtqy ister ministri Beibit Atamqulovty qabyldady, dep habarlaidy "Ult aqparat" Aqordanyń baspasóz qyzmetine silteme jasap.
Kezdesý barysynda Memleket basshysyna elimizdiń syrtqy saiasatyn odan ári ekonomikalandyra túsý jónindegi jumys jospary men ministrlik aldynda turǵan mindetterdiń oryndalýy týraly málimet usynyldy.
Nursultan Nazarbaev elimizdiń syrtqy saiasatyn ekonomikalandyrýdyń jáne syrtqy saiasi baǵytymyzdy ári qarai tiimdi júzege asyrýdyń mańyzdylyǵyna toqtaldy.
- Kún tártibindegi halyqaralyq máselelerdi de umytpaýymyz kerek. Syrtqy ister ministrliginiń mindeti - elimizdiń syrtqy saiasatyn jáne beibitshilik pen tatý kórshilik saiasatyn belsendi júrgizý. Bastaǵan isimizdiń bárin odan ári jalǵastyrý qajet, - dedi Qazaqstan Prezidenti.
Beibit Atamqulov Memleket basshysyna investitsiialyq jobalardy ilgeriletý jumystaryna júrgizilgen taldaý nátijeleri men ministrliktiń ortalyq apparatynyń qyzmetin qaita túzý máseleleri jóninde málimdedi.
Syrtqy ister ministri Qazaqstannyń diplomatiialyq missiialaryn syrtqy saiasatty ekonomikalandyrý jónindegi jańa mindetterge sáikes jumystarǵa beiimdeý úshin qabyldanǵan sharalar týraly baiandady, sondai-aq el eksportynyń baǵyttaryn qaita qarastyrý úderisi jóninde aitty.
Elbasy kezdesý qorytyndysy boiynsha birqatar naqty tapsyrma berdi.
