Memleket basshysy Abý Dabi ámirliginiń Taq murageri Sheih Muhammed ben Zaid Ál Nahaianǵa quttyqtaý jedelhatyn joldady, dep habarlaidy Aqorda.
Qasym Jomart Toqaev qazaqstandyqtardyń jáne jeke óziniń atynan Abý Dabi ámirliginiń Taq murageri Sheih Muhammed ben Zaid Ál Nahaiandy Birikken Arab Ámirlikteriniń ǵaryshty igerý salasyndaǵy orasan zor jetistigimen quttyqtap, jedelhat joldady.
Prezident jedelhatynda byltyr shilde aiynda Marsty zertteýge jiberilgen «Ál-Amal» spýtniginiń planeta orbitasyna enýi Ámirlikterdiń ǵaryshty igerýshi úzdik memleketter qataryna kirgenin jáne álemdik tabysqa qol jetkizgenin dáleldeitindigin atap ótken.
«Islam jáne arab álemindegi saiasi, ekonomikalyq negizi berik qalyptasqan, óńirlik jáne jahandyq turǵydan kóshbasshylyǵy keńinen moiyndalǵan elińiz Sizdiń basshylyǵyńyzben qarqyndy damýyn odan ári jalǵastyrýyna, mereiiniń árqashan ústem bolýyna tilektespin. Osy tusta, álemge áigili «Baiqońyr» ǵarysh ailaǵyndaǵy Qazaqstan men Ámirlikterdiń ǵarysh salasyna qatysty birlesken baǵdarlamasynyń da bolashaqta nátijeli bolaryna senim bildiremin. Sizdiń elińizben osy baǵytta kúsh-jiger jumyldyrýǵa jáne ǵylymi zertteýler júrgizýge árdaiym daiyn ekenimizdi naqtylaimyn», – delingen jedelhatta.
Sonymen qatar Qasym-Jomart Toqaev Sheih Muhammed ben Zaid Ál Nahaiannyń asa jaýapty qyzmetine tolaǵai tabys, al baýyrlas ámirlikterdiń halqyna baiandy baqyt, qut-bereke tiledi.
