Memleket basshysy elshilerden senim gramotalaryn qabyldady, dep habarlaidy "Ult aqparat" Aqordaǵa silteme jasap.
Rásim barysynda Qazaqstan Prezidenti Nursultan Nazarbaevqa Qytai Halyq Respýblikasynyń Tótenshe jáne ókiletti elshisi Chjan Siao, Ispaniia Koroldiginiń Tótenshe jáne ókiletti elshisi David Artýro Karriedo Tomas, Izrail memleketiniń Tótenshe jáne ókiletti elshisi Liat Vekselman, Slovakiia Respýblikasynyń Tótenshe jáne ókiletti elshisi Milan Kollar jáne Eýropa Odaǵynyń Tótenshe jáne ókiletti elshisi Sven-Olov Karlsson senim gramotasyn tapsyrdy.
Nursultan Nazarbaev elshilerdi Qazaqstandaǵy diplomatiialyq missiialarynyń resmi túrde bastalýymen quttyqtap, olarǵa memleketaralyq qatynastardy damytý jáne ony odan ári ilgeriletý isinde tabys tiledi.
– Sizderdiń missiialaryńyzdyń bastalýy el damýynyń mańyzdy kezeńimen tuspa-tus kelip otyr. Bizdiń strategiialyq baǵytymyz – álemniń ozyq damyǵan 30 eliniń qataryna qosylý. Osyǵan orai, qajetti baǵdarlamalardyń bárin qabyldap, keshendi reformalardy júzege asyryp kelemiz, – dedi Memleket basshysy.
Qazaqstan Prezidenti álemdik daǵdarys kúsheigen jaǵdaida senimdi memleketaralyq qatynastar ornatýdyń mańyzdy ekenin aitty.
– Jaqynda Niý-Iorkte ótken Birikken Ulttar Uiymy Bas Assambleiasynyń kezekti sessiiasynda keibir elder arasynda «senim daǵdarysynyń» odan ári órshi túskeni anyq baiqaldy. Ózara senim ornyqpasa, daǵdarysqa qarsy kez-kelgen is-qimyldyń oń nátijesi bolmaidy, – dedi Nursultan Nazarbaev.
Memleket basshysy halyqaralyq jáne óńirlik qaqtyǵystardy retteý úshin Qazaqstannyń júrgizip otyrǵan kópvektorlyq saiasaty men kúsh-jigeriniń tiimdiligin atap ótti.
Elbasy Qazaqstan men Qytai arasyndaǵy qarym-qatynastardyń qazirgi jaǵdaiy men damý perspektivalaryna arnaiy toqtaldy.
– Qazaqstan Qytaimen jan-jaqty strategiialyq yntymaqtastyqty damytýǵa erekshe mán beredi. Diplomatiialyq bailanys ornaǵan sátten bastap biz tatý kórshilik jáne ózara túsinistik rýhynda damyp kele jatqan memleketaralyq qatynastardyń úlgili modelin qurdyq. Búginde eki eldiń úkimetteri ózara kelisimderdi júzege asyrý úshin belsendi jumys atqarýda. «Nurly jol» jańa ekonomikalyq saiasatyn «Jibek jolynyń ekonomikalyq beldeýi» bastamasymen ushtastyrý jónindegi yntymaqtastyqqa erekshe kóńil bólinip otyr, – dedi Memleket basshysy.
Sondai-aq, Nursultan Nazarbaev biyl elimizdiń Eýropa Odaǵymen diplomatiialyq qatynas ornatqanyna 25 jyl tolǵanyn atap ótti.
– Qazirgi basty mindetimiz – 2015 jyly qol qoiylǵan Qazaqstan men Eýroodaq arasyndaǵy Keńeitilgen áriptestik pen yntymaqtastyq týraly kelisimdi júzege asyrý. Sondai-aq, Briýsseldiń Ortalyq Aziia elderine qatysty jańa strategiiasyn ázirleýge kúsh jumyldyrý kerek. Biz Qazaqstan men Eýroodaq arasyndaǵy vizalyq rejimdi jeńildetý máselesi durys sheshimin tabady dep senemiz, – dedi Qazaqstan Prezidenti.
Rásimge qatysýshylar aldynda sóilegen sózinde Memleket basshysy Qazaqstan men Ispaniia Koroldigi arasyndaǵy qatynastardyń strategiialyq sipatyn atap ótti.
– 2017 jyly maýsym aiynda Uly Mártebeli Ispaniia Koroli VI Felipe Qazaqstanǵa alǵashqy resmi saparmen kelip, «EKSPO-2017» halyqaralyq kórmesiniń ashylýyna qatysty. Ózara ýaǵdalastyqtarymyzdy júzege asyrýǵa Ekonomika jáne ónerkásip salasyndaǵy yntymaqtastyq týraly úkimetaralyq komissiia men Iskerlik keńes zor úles qosyp keledi, – dedi Nursultan Nazarbaev.
Sondai-aq, Elbasy ekonomikanyń túrli sektorynda Qazaqstan men Izrail arasyndaǵy qatynastardy odan ári damytýǵa múddeli ekenin bildirdi.
– 2016 jyly Izrail Premer-Ministri Biniamin Netaniahýdyń Qazaqstanǵa resmi sapary jáne sonyń barysynda ótken biznes-forým ózara yqpaldastyǵymyzdyń aiasyn keńeitýge tyń serpin berdi. Biz ózara qatynastarymyzdy, ásirese aýyl sharýashylyǵy, innovatsiialyq tehnologiialar jáne densaýlyq saqtaý salalaryn odan ári damytýǵa múddelimiz, – dedi Memleket basshysy.
Qazaqstan Prezidenti Slovakiiamen yntymaqtastyqtyń oń qarqynyn atap ótip, eki el arasyndaǵy saýda ainalymyn arttyrýdyń jáne ekonomikalyq yntymaqtastyqtyń jańa baǵyttaryn damytýdyń mańyzdy ekenin aitty.
– Saýda-ekonomikalyq bailanystardy nyǵaitýǵa Ekonomikalyq jáne ǵylymi-tehnikalyq yntymaqtastyq jónindegi úkimetaralyq komissiia zor úles qosyp keledi. Bolashaqta bizge taýar ainalymyn ulǵaityp, ózara ekonomikalyq qatynastardy damytýdyń jańa baǵyttaryn aiqyndaý qajet, – dedi Nursultan Nazarbaev.
Rásim sońynda Memleket basshysy diplomattardy Qazaqstandaǵy jaýapty missiialarynyń bastalýymen taǵy da quttyqtady.
