Memleket basshysy Qasym-Jomart Toqaev Básekelestikti qorǵaý jáne damytý agenttiginiń tóraǵasy Serik Jumanǵarindi qabyldady, dep habarlaidy Aqorda.
Qasym-Jomart Toqaevqa elimizdegi básekelestikti damytýdyń negizgi baǵyttary men atalǵan salany jetildirý jóninde berilgen tapsyrmalardyń oryndalý barysy týraly esep berildi.
Serik Jumanǵarin Prezidentke ártúrli naryqtarda básekelestikti damytýǵa kedergi bolyp otyrǵan máseleler týraly jáne Básekelestikti damytý jónindegi ulttyq jobanyń ázirlenip jatqanyn aitty.
Qasym-Jomart Toqaevqa zańnamadaǵy keibir ózgerister, atap aitqanda, memleket ieliginen shyǵarý saiasatyna qatysty, memlekettik jáne jekemenshik operatorlardy retteý tetikteri, sondai-aq, básekelestik salasynyń damýyna normativtik-quqyqtyq aktilerdiń áserin baǵalaýdy engizý jaiynda baiandaldy.
Sala mamandarynyń kásibi áleýetin kóterý sheńberinde Prezidentke KAZGIýÝ Ýniversitetiniń bazasynda «Básekelestik quqyq» mamandyǵy boiynsha magistratýranyń bilim berý baǵdarlamasynyń ashylǵany jóninde aityldy.
Sonymen qatar, Serik Jumanǵarin Memleket basshysyna biylǵy jyldan bastap elimizde ashyq birjalyq saýda bastalatynyn, onyń munai ónimderi, kómir, elektr energiiasy, suiytylǵan gaz jáne AÓK ónimderin qamtitynyn habarlady.
Budan bólek Prezidenttiń tapsyrmasy boiynsha farmatsevtika, gaz salalarynda júrgizilip jatqan tekserýlerdiń barysy, sondai-aq, dári-dármek baǵasyn retteýdiń jańa tásilderi týraly jan-jaqty baiandaldy.
Kezdesý sońynda Qasym-Jomart Toqaev Agenttik tóraǵasyna birjalyq saýdany damytýǵa, vedomstvo júrgizip jatqan tekserýlerge, sondai-aq, shaǵyn jáne orta biznesti qorǵaý jáne damytýǵa bailanysty birqatar tapsyrma berdi.
