Foto: Aqorda
Prezident Qasym-Jomart Toqaev Premer-ministr Oljas Bektenovti qabyldap, buǵan deiin berilgen ekonomikalyq reformalardy júzege asyrý jáne azamattardyń ál-aýqatyn arttyrý jónindegi tapsyrmalardyń oryndalý barysy týraly esep tyńdady, dep habarlaidy Ult.kz.
Úkimet basshysy Memleket basshysyna elimizdiń biylǵy áleýmettik-ekonomikalyq damýynyń aldyn ala qorytyndylaryn baiandady. Prezidenttiń ekonomikany ártaraptandyrý jónindegi tapsyrmasyn oryndaý nátijesinde ishki jalpy ónim ósiminiń 70 paiyzdan astamyn ónerkásip, saýda jáne kólik salalary qamtamasyz etip otyr.
2025 jyldyń qańtar–qarasha ailary aralyǵynda kólik qyzmeti 20,3 paiyzǵa, qurylys salasy 14,7 paiyzǵa, saýda 8,8 paiyzǵa, aýyl sharýashylyǵy 6,1 paiyzǵa, al óńdeý ónerkásibi 5,9 paiyzǵa ósken. Negizgi kapitalǵa salynǵan investitsiia kólemi 18,5 trln teńgege jetip, jeke investitsiialar 9,8 paiyzǵa artqan.
Sondai-aq Oljas Bektenov Úkimet, Ulttyq bank jáne Qarjy naryǵyn retteý jáne damytý agenttiginiń 2026–2028 jyldarǵa arnalǵan makroekonomikalyq turaqtandyrý men halyqtyń ál-aýqatyn arttyrý boiynsha birlesken is-qimyl baǵdarlamasynyń júzege asyrylýy jóninde aitty. Bul rette halyqtyń naqty tabysyn ósirý, turmys deńgeiin jaqsartý arqyly ishki jalpy ónimniń ósimin qamtamasyz etý negizgi basymdyq retinde belgilengen. Infliatsiia deńgeiin tómendetý sharalary da qarastyrylyp jatyr.
Premer-ministr jeltoqsan aiynda shekaradaǵy bes ótkizý beketin jańǵyrtý jumystarynyń aiaqtalǵanyn, qazaqstandyq taýar óndirýshiler reestriniń iske qosylǵanyn jáne shaǵyn biznesti qoldaýǵa arnalǵan «Isker aimaq» biryńǵai baǵdarlamasynyń qabyldanǵanyn habarlady. Sonymen qatar jylytý maýsymynyń barysy jáne 2026 jylǵy dala jumystaryn qarjylandyrýdyń erte bastalǵany jóninde málimet berdi. Bul shara egis alqaptarynyń kólemin saqtaýǵa jáne ulǵaitýǵa, sondai-aq aýyl sharýashylyǵy ónimderin óńdeý men eksportty damytýǵa baǵyttalǵan.
Kezdesý qorytyndysynda Memleket basshysy Úkimet basshysyna azamattardyń múddesine sai elimizdiń turaqty damýyn qamtamasyz etý boiynsha jumysty jalǵastyrýdy tapsyrdy. Sondai-aq investitsiia tartý, kásipkerlikti qoldaý, injenerlik jáne kólik infraqurylymyn jańǵyrtý baǵytynda birqatar naqty mindet júktedi.
