Memleket basshysy Pavlodar oblysyna jumys sapary barysynda Qazaqstandy indýstriialandyrý kartasy aiasynda túbegeili jańartylǵan ári óndiris úderisi tsifrlandyrylǵan Pavlodar munai himiiasy zaýytynyń jumysymen tanysty, dep habarlaidy "Ult aqparat" Aqordanyń baspasóz qyzmetine silteme jasap.
Qazaqstan Prezidentine jańartý jumystary zaýyttyń shiki munaidy qaita óńdeý ónimdiligin arttyrýǵa, ónim sapasyn K-4 jáne K-5 standarttaryna deiin jetkizýge múmkindik bergeni jóninde málimdeldi. Izomerizatsiialaýdyń jańa avtomattandyrylǵan keshenderi jáne ortalyq basqarý pýnkti arqyly basqarylatyn kúkirt óndiretin qondyrǵylar salyndy.
Nursultan Nazarbaev Qazaqstanda munai óndirý kóleminiń artýyna bailanysty daiyn ónim kólemin molaitý úshin ári ony ishki jáne sheteldik naryqtarǵa shyǵarý úshin halyqaralyq standarttarǵa sai keletin munaidyń qaita óńdelýin meilinshe jaqsartýdy qolǵa alý qajettigin aitty.
Elbasy Qazaqstandaǵy munai óńdeitin úsh zaýyttyń jańartylǵanyna qaramastan, tórtinshi zaýyt salý qajettigi týyndap otyrǵanyn atap ótti.
Qazaqstan Prezidenti zaýyttyń jas jumyskerlerimen áńgimelesý barysynda Pavlodar munai himiiasy zaýyty Keńes Odaǵy kezinde salynǵan zaýyttardyń sońǵysy ekenin aityp, onyń sol ýaqyttaǵy eń ozyq qural-jabdyqtarmen jabdyqtalǵanyna toqtaldy.
«Sizder eń zamanaýi zaýytta jumys isteisizder. Munda óndiristi tsifrlandyrý isi qolǵa alynyp, jańa tehnologiialar engizilýde. Sizder óndirip jatqan ónimge degen suranys artyp keledi, demek, sizderdiń de tabystaryńyz molaia túspek», - dedi Nursultan Nazarbaev.
Jas mamandar Memleket basshysyna «Bolashaq» baǵdarlamasy arqyly álemniń úzdik joǵary oqý oryndarynda bilim alýǵa jáne alǵan bilimderin óndiriste qoldanýǵa múmkindik týǵyzǵany úshin alǵys aitty.
.jpeg)