Prezident Pavlodar aliýminii zaýytynyń qyzmetimen tanysty, dep habarlaidy "Ult aqparat" Aqordanyń resmi saityna silteme jasap.
Kásiporyn jetekshisi Roman Romanov Memleket basshysyna oblystyń metallýrgiialyq klasterindegi kásiporyndar shyǵarǵan daiyn ónimderdi tanystyrdy. Bul jerde bastapqy aliýminiiden bastap aliýminii radiatorlaryna jáne avtomobil diskilerine deiingi túrli ónim qamtylǵan. «Qazaqstan aliýminiii» AQ 8 myńǵa jýyq adamdy jáne olardyń otbasyn turaqty jumyspen qamtamasyz etip, olardyń áleýmettik jaǵdaiyna kóńil bólip otyr.
Budan keiin Eýraziialyq toptyń basqarma tóraǵasy Serik Shahajanov Qasym-Jomart Toqaevqa ERG ónerkásiptik kásiporyndarynyń shyǵaratyn qaldyqtaryn kezeń-kezeńmen qysqartýdy kózdeitin Ekologiialyq strategiianyń júzege asyrylýy jóninde aitty. 2030 jylǵa deiin qatty qaldyqtardyń kólemin 50 myń tonnaǵa (57 paiyzǵa) azaitý josparlanyp otyr. Zaýyttar men jylý elektr stansalaryndaǵy súzgiler aýystyrylady, kúl jinaityn qondyrǵylar salynady jáne kómirteginen aryltý jobalary júzege asyrylady. Sondai-aq Eýraziialyq top aldaǵy 3 jylda 420 myń aǵash egýdi josparlap otyr. Onyń jartysynan kóbi Pavlodar oblysynda egiledi. Sonymen qatar kompaniia Qostanai oblysynda bolǵan órtten keiingi orman alqabyn qalpyna keltirýge qosymsha 1 milliard teńge bóldi.
Sonymen qatar Prezidentke kompaniianyń áleýmettik mindettemelerin oryndaý barysy, onyń óńirlerdegi «Halyqtyń biýdjetke aralasýy» bastamasy, jergilikti turǵyndardyń áleýmettik túsinigi men proaktivtiligin arttyrý, innovatsiialyq qyzmet úshin jaǵdai jasaý jáne biznestiń áleýmettik jaýapkershiligi jónindegi basqa da jobalar týraly baiandaldy.
Budan keiin «Qazaqstan aliýminiii» AQ eńbek ujymymen emen-jarqyn áńgimelesken Qasym-Jomart Toqaev aktsionerlerdiń barlyq áleýmettik mindettemesin oryndaýynyń mańyzdy ekenin atap ótti.
– Sizder Qazaqstan Respýblikasy indýstriiasynyń flagmany sanalatyn óte mańyzdy kásiporynda jumys isteisizder. Men jańa ǵana prezentatsiialardy kórdim. Kásiporynnyń qyzmetimen tanyspyn. Munda adamdardyń qalai jumys isteitinin jáne qandai ónimder shyǵaratynyn bilemin. Olar Qazaqstan Respýblikasyna qajet jáne shetelde úlken suranysqa ie. ERG toby kásiporyndarynyń basshylyǵy áleýmettik máselelerdi sheshýge, áleýmettik baǵdarlamalardy iske asyrýǵa jáne tiisti nysandardyń qurylysyna erekshe nazar aýdarady. Osy oraida biz árqashan qoldaimyz. Sizderge sáttilik tileimin! – dedi Prezident.
