Prezident Qasym-Jomart Toqaev Parlament Senaty depýtattarynyń aldynda sóilegen sózinde joǵary palata qoǵamdaǵy ózekti ári eldi alańdatqan máselelerdi kóteretinin atap ótti, dep habarlaidy Aqordanyń baspasóz qyzmeti.
«Búkil elimizdiń aldynda turǵan mindetterdi oryndaý úshin eń aldymen bilik tarmaqtary arasyndaǵy úilesim qajet. Mańyzdy reformalardy júzege asyrýda Parlamenttiń, ásirese, Senattyń róli de, quzyreti de erekshe. Senattyń eń basty mindeti – sapaly zańdardy qabyldaý. Mundai zańdar reformalarǵa jol ashady, turaqtylyq pen tártipti qamtamasyz etedi», – dedi Qasym-Jomart Toqaev.
Memleket basshysy Dariǵa Nazarbaevanyń Senat Tóraǵasy laýazymynda atqarǵan qyzmetin joǵary baǵalap, oǵan óz rizashylyǵyn bildirdi.
«Ózderińizge málim, meniń Jarlyǵymmen Senat depýtaty Dariǵa Nursultanqyzy Nazarbaevanyń ókilettigi toqtatyldy. Ol Senat tóraǵasy retinde bir jyldan astam belsendi ári jemisti jumys istedi. Sol úshin Dariǵa Nursultanqyzyna rizashylyǵymdy bildirdim», – dedi Prezident.
Búgingidei kúrdeli kezeńnen elimizdi aman-esen alyp shyǵý úshin Senat depýtattaryn jumyla jumys isteýge shaqyrǵan Qasym-Jomart Toqaev Parlament Senatynyń Tóraǵasy laýazymyna Máýlen Áshimbaevtyń kandidatýrasyn usyndy.
«Ol memleket isiniń qyr-syryn jetik meńgergen, uzaq jyl túrli salada jemisti jáne tiimdi qyzmet atqardy. Parlament jumysyn jaqsy biledi. Árdaiym ózine júktelgen mindetterdi abyroimen atqaryp keledi. Memlekettik qyzmettegi tájiribesi mol. Sondyqtan bul qyzmetti abyroimen atqaratynyna kúmánim joq», – dedi Memleket basshysy.
Jasyryn daýys berý qorytyndysy boiynsha Máýlen Áshimbaev Parlament Senatynyń Tóraǵasy bolyp sailandy.
Memleket basshysynyń QR Parlamenti Senatynda sóilegen sóziniń tolyq nusqasymen myna silteme arqyly tanysýǵa bolady.
