Memleket basshysy Ózbekstan Prezidentimen shaǵyn quramda kelissóz ótkizdi, dep habarlaidy "Ult aqparat" Aqordanyń resmi saityna silteme jasap.
Aqorda rezidentsiiasynda Qazaqstan astanasyna memlekettik saparmen kelgen Ózbekstan Prezidenti Shavkat Mirziioevti saltanatty qarsy alý rásimi ótti. Qurmet qaraýyly rotasynyń bastyǵy memleket basshylaryna raport bergennen keiin eki eldiń ánurandary oryndaldy. Budan keiin Qasym-Jomart Toqaev pen Shavkat Mirziioev Shyǵys zalynda shaǵyn quramda kelissóz ótkizdi.
Qazaqstan men Ózbekstan basshylary ekijaqty strategiialyq seriktestiktiń keń aýqymdy máselelerin talqylady. Atap aitqanda saiasi, saýda-ekonomikalyq, investitsiialyq, kólik tranzittik, mádeni-gýmanitarlyq yntymaqtastyq siiaqty negizgi aspektiler qarastyryldy. Sondai-aq aimaqtaǵy, sonyń ishinde, qaýipsizdikti qamtamasyz etý jáne kópjaqty qurylymdar aiasyndaǵy ózara is-qimyl máseleleri sóz boldy.
Qasym-Jomart Toqaev qazaq-ózbek yntymaqtastyǵyn jańa deńgeige kóterý turǵysynan, Shavkat Mirziioevtiń qazaq jerinde ótip jatqan memlekettik saparynyń mańyzdy ekenin atap ótti.
– Biz búgin odaqtastyq qatynastar týraly Deklaratsiiaǵa qol qoiamyz. Buǵan deiin strategiialyq seriktestik qaǵidalaryna súienip kelgen bolsaq, aldaǵy ýaqytta bizdiń ózara qarym-qatynastarymyz shyn mánindegi jańa deńgeige kóteriledi. Sondyqtan búgin qol qoiylatyn qujattar elderimizdiń arasyndaǵy yntymaqtastyqqa tyń serpin beredi dep esepteimin. Biz úkimetterimizge jaqyn arada saýda kólemin 5 milliard dollarǵa, keiinirek 10 milliard dollarǵa deiin jetkizý týraly tapsyrma berýge ýaǵdalastyq. Bul - óte joǵary deńgei, – dedi Memleket basshysy.
Qazaqstan Prezidenti aimaqtaǵy turaqtylyq pen qaýipsizdikti qamtamasyz etý isindegi eki memlekettiń róli týraly aitty.
– Elderimiz arasyndaǵy odaqtastyq, strategiialyq qarym-qatynastar – Ortalyq Aziia aimaǵyndaǵy turaqtylyq pen qaýipsizdikti qamtamasyz etýdiń mańyzdy faktory. Bul - eshqandai artyq aitqandyq emes. Eki el arasyndaǵy bailanystar qanshalyqty tyǵyz bolsa, bizdiń mańyzdy aimaqtaǵy ahýal da sonshalyqty turaqty bolady, – dedi Qasym-Jomart Toqaev.
Shavkat Mirziioev qazaq jerinde kórsetilgen dástúrli qonaqjailyq úshin rizashylyǵyn bildirip, óziniń jáne ózbek halqynyń atynan Qasym-Jomart Toqaevty jáne Qazaqstan halqyn Táýelsizdiktiń 30 jyldyq mereitoiymen quttyqtady.
Ózbekstan basshysy Qazaqstan Prezidentiniń basshylyǵymen elimizdiń jetken jetistikterin joǵary baǵalady. Sondai-aq ol ekijaqty qatynastardyń damýyna Elbasy Nursultan Nazarbaevtyń zor úles qosqanyn atap ótti.
Ózbekstan Prezidenti óziniń memlekettik sapary Qazaqstan Táýelsizdiginiń 30 jyldyǵy qarsańynda ótip jatqanynyń simvoldyq máni bar ekenin aitty. Ol eki el halyqtarynyń arasyndaǵy ǵasyrlar boiy qalyptasqan dostyq qarym-qatynastar memleketaralyq bailanystardy nyǵaitýǵa zor septigin tigizetinine senim bildirdi. Sondai-aq eki el úkimetteriniń osy sapar qarsańynda atqarǵan nátijeli jumystaryn atap ótti.
