Foto: Aqorda
Memleket basshysy Ózbekstan Prezidentin týǵan kúnimen quttyqtap, onyń baýyrlas ózbek halqynyń igiligi jolynda atqaryp jatqan jaýapty memlekettik qyzmetine tolaiym tabys tiledi, dep habarlaidy Ult.kz.
Qasym-Jomart Toqaev Shavkat Mirziioevtiń bedeldi kóshbasshylyǵynyń arqasynda Ózbekstan damýdyń dańǵyl jolyna túsip, áleýmettik-ekonomikalyq salada eleýli jetistikke jetkenin atap ótti.
Áńgimelesý barysynda eki el arasynda senimge, tatý kórshilik bailanystarǵa ári ózara qoldaýǵa negizdelgen strategiialyq jáne odaqtastyq qatynastar qalyptasqanyna nazar aýdaryldy. Saýda-ekonomikalyq, mádeni-gýmanitarlyq yntymaqtastyq pen ǵylym-bilim salasyndaǵy seriktestik nyǵaiyp keledi.
Qasym-Jomart Toqaevtyń aitýynsha, búkil Orta Aziianyń ornyqty damýy kóbine eki memlekettiń ózara yqpaldastyǵyna tikelei bailanysty. Osyǵan orai taraptar ónerkásip, energetika, kólik, logistika jáne aýyl sharýashylyǵy baǵyttaryndaǵy birlesken jobalardy ilgeriletý úshin naqty sharalar qabyldap jatyr.
Qasym-Jomart Toqaev pen Shavkat Mirziioev óńirlik kooperatsiianyń ózekti máseleleri jóninde pikir almasyp, ekijaqty formatta jáne halyqaralyq is-sharalar aiasynda josparlanǵan joǵary deńgeidegi kezdesýler kestesin qarastyrdy.
