Búgin Úkimettiń keńeitilgen otyrysynda QR Prezidenti Nursultan Nazarbaev ministrler men ákimderdi ne úshin synaǵanyn aitty, dep habarlaidy QazAqparat.
«Osynda otyrǵan barlyqtaryńyzdy, iaǵni Úkimet músheleri men ákimderdi tańdap otyryp taǵaiyndadym. Sizder basqa memlekettik qyzmetshilerdi taǵaiyndadyńyzdar. Sondyqtan bizdiń bir-birimizdiń aldymyzdaǵy jaýapkershiligimiz birdei. Árqaisyńdy men bilemin. Qandai áleýetteriń, bilimderiń, tájiribeleriń bar ekeninen habardarmyn. Búgingi Úkimet aldynda qandai maqsat tursa da, ony istei alady. Biraq ózin-ózi qamshylap, jumys isteýi tiis. Kúndiz-túni jumysty oilaý kerek», - dep toqtaldy Elbasy.
Osy oraida Prezident búgin otyrys barysynda aitylǵan synnan ministrler men ákimder sabaq alýy qajettigin qadap aitty.
«Qazaqta «aitqannyń aýzy jaman, jylaǵannyń kózi jaman» degen sóz bar. Men sizderdi renjitý úshin synaǵan joqpyn. Sizderge sengennen keiin osynyń barlyǵyn aityp otyrmyn. Jumys isteý qoldaryńnan keledi. Sondyqtan búgingi aitylǵan máseleler mańyzdy. Úkimet pen ákimder birigip, halyqtyń maqsaty úshin jumys istep, tabysyn kóterip, ál-aýqatyn jaqsartýy tiis», - dedi Nursultan Nazarbaev.
Elbasynyń atap ótýinshe, strategiialyq memlekettik baǵdarlamalar men basqa da mindetter sapaly ári tiimdi oryndalýy qajet. Sáikesinshe, Úkimet osy baǵyttaǵy sharalardy basty nazarǵa alýy kerek.
Aita keteiik, Astanada Úkimettiń keńeitilgen quramdaǵy otyrysy ótip jatyr.
Prezident birqatar saladaǵy túiitkildi máselelerdi kóterdi. Atap aitqanda, bank salasyndaǵy bylyqtar, keleshegi joq kompaniialardyń nesielendirilýi, jylyna 60 myń tonna et eksporttaý josparynyń oryndalmaýy, jeńil ónerkásibi men aýyl sharýashylyǵy salalaryndaǵy tolassyz import, kóleńkeli ekonomikamen kúrestiń álsizdigi jáne taǵy da basqa máseleler qozǵaldy.
