Prezident Qasym-Jomart Toqaev Mekkege barǵanda ne tilegenin aitty, - dep habarlaidy "Ult aqparat" Aqordanyń baspasóz qyzmetine silteme jasap.
"Men qasietti Mekkege barǵan kezde Qaǵba tórinde jáne osy joly kieli Túrkistanda ata-babalarymyzǵa quran baǵyshtap, handarymyzdyń rýhyna taǵzym etip, Alladan bir-aq tilek tiledim. Ol - elimizdiń amandyǵy jáne halqymyzdyń birligi", - dedi ol.
Memleket basshysy Túrkistan oblysynyń elimizdegi mańyzyn jetkizip, óńirdegi bastamalardy aitty.
"Túrkistan oblysy - elimizdegi halyq eń tyǵyz qonystanǵan aimaq. Munda 2 millionnan astam adam turady. Áleýmettik saladaǵy bastamalar ár azamattyń turmysyna ózgeris ákeledi. Oblysta apatty jaǵdaidaǵy jáne úsh aýysymmen oqityn mektepter áli de bar. Memleket bul máseleni sheshýge barynsha kúsh salady. Keiingi jyldary 83 jańa mektep paidalanýǵa berildi. Qazir 59 mektep salynyp jatyr. Sebebi elimizdiń árbir 7-sábii osy óńirde dúniege keledi. Olarǵa sapaly bilim ordalaryn salyp, jaǵdai jasaý - mańyzdy mindettiń biri", - dedi Toqaev.
Prezident Saryaǵash aýdanyn damytý jaiy týraly da aitty.
"Ońtústiktegi 6 aýdanda 900 myńǵa jýyq adam turady. Demografiialyq ósim boiynsha Saryaǵash aýdany kósh bastap tur. Sondyqtan osy aýdanda perzenthanasy bar meditsinalyq keshen salýdy tapsyramyn.
Oǵan qajet qarjyny respýblikalyq biýdjetten bólý kerek. Munyń bári turǵyndardyń densaýlyǵyn jaqsartýǵa septigin tigizeri sózsiz", - dedi Memleket basshysy.
Sondai-aq, Toqaev jastarǵa qoldaý kórsetiletinin, sonyń ishinde shaǵyn nesie beriletinin atap ótti.
"Elimizdegi kóp balaly analardyń úshten biri Túrkistan oblysynda turatyny belgili. Sondyqtan bul bastama sizder úshin de óte mańyzdy.
Biz jastarǵa jan-jaqty qoldaý kórsetemiz. Olardyń kásipkerlik bastamalary úshin ósimi 2,5 paiyz bolatyn shaǵyn nesie beriledi. Jastarymyz osyndai múmkindikterdi utymdy paidalanyp, óz kásibin bastaidy dep senemin.
Bir sózben aitqanda, memleket zeinettegi qariialar men besik terbetken analarǵa qoldaý kórsete beredi. Al jalyndy jastarǵa ómirde óziniń laiyqty ornyn tabýǵa jaǵdai jasaimyz", - dedi Prezident.
