Foto: Aqorda
Memleket basshysy kúshtik qurylym qyzmetkerlerin marapattady, dep habarlaidy Ult.kz.
Prezident UAE SWAT Challenge saiysynda top jarǵan kúshtik qurylymdardyń bir top ofitserin marapattaý rásiminde sóz sóiledi.
Biyl Dýbaida ótken dúbirli dodaǵa Qazaqstan atynan 12 komanda qatysqan. Ishki ister ministrliginiń «Suńqar» jáne «Tomiris» komandalary halyqaralyq jarystyń kúmis júldegeri atandy. Al Ulttyq qaýipsizdik komitetiniń «Arystan» komandasy tórtinshi orynǵa ie boldy. Memlekettik kúzet qyzmeti men Qorǵanys ministrliginiń komandalary da sheberliktiń úzdik úlgisin kórsetti.
Foto: Aqorda
Memleket basshysy jeńimpazdardy quttyqtap, bul tabys tiianaqty daiyndyq pen qajyrly eńbektiń nátijesi ekenin atap ótti.
– «Eldiń atyn er shyǵarar» degen. Saiypqyran sarbazdarymyz kók týymyzdy asqaq jelbiretti. Tórtkúl dúnie jaýyngerlerimizdiń myqtylyǵyna kýá boldy. Biz sizderdi maqtan tutamyz. Osyndai jeńisti sátter barsha halqymyzdyń, ásirese, óskeleń urpaqtyń rýhyn kóteredi. El qorǵany myqty bolsa, Qazaqstannyń eńsesi árdaiym biik bolmaq, – dedi Qasym-Jomart Toqaev.
Foto: Aqorda
Qasym-Jomart Toqaev el tynyshtyǵyn kúzetken arnaýly qyzmetter men kúshtik qurylymdardyń atqarǵan isterine toqtaldy.
– Byltyr Ulttyq qaýipsizdik komiteti zańsyz áreketterdiń aldyn alý úshin jiyrmadan astam jedel jaýyngerlik is-shara ótkizdi. Eki terrorlyq aktiniń jolyn kesip, qaskóilerge tosqaýyl qoidy. Ulttyq ulan jasaqtary tótenshe jaǵdailardyń saldaryn joiýǵa belsene atsalysty. Ishki ister ministrliginiń qurylymdary aýqymdy jumys atqaryp jatyr. Ótken jyly esirtki óndiretin 64 oryn jabyldy. 22 myń tonna esirtki tárkilendi. Esirtkini jarnamalaǵan 7,5 myń sait buǵattaldy. Eki milliard teńgeden astam qarjyny shetelge shyǵarmaq bolǵan alaiaqtardyń joly kesildi. Sońǵy úsh jylda 8 myńǵa jýyq túrli qarý-jaraq tabyldy. Mundai mysaldar óte kóp. Arnaýly qyzmet qataryndaǵy myńdaǵan sarbaz memlekettiń egemendigi men azamattardyń qaýipsizdigin qorǵap júr. Jaýyngerlerimiz qashanda Otan aldyndaǵy antyna adal, – dedi Memleket basshysy.
Prezident qazir keibir memleketter, tipti alpaýyt elder syrtqy jáne ishki saiasatyndaǵy ustanymdaryn qaita qarap jatqanyn mysalǵa alyp, Qazaqstan dástúrli ári zamanaýi qundylyqtardy teń ustaityn pragmatizmge áldeqashan bet burǵanyn jetkizdi.
– Zań men tártip ústemdigin ornatý mańyzdy ekenin árdaiym aityp júrmiz. Ýaqyt bizdiń ustanymdarymyz ben strategiialyq baǵdarymyzdyń durys ekenin kórsetti. Sondyqtan biz aldaǵy ýaqytta da ulttyq múddemizdi qorǵap, elimizge laiyqty biregei jolmen júremiz. Jalpyulttyq qundylyqtarymyzdy dáripteimiz. Eshkimge jaltaqtamai, óz saiasatymyzdy júrgizemiz. Óitkeni bizdiń maqsatymyz – aiqyn. Bul – qýatty jáne órkendegen Qazaqstandy qurý, – dedi Qasym-Jomart Toqaev.
Prezident sózin qorytyndylai kele, ofitserlerdiń qyzmetine sáttilik tiledi jáne olardy memlekettik nagradalarmen marapattady.
Jiynda QR Ishki ister ministrliginiń «Suńqar» komandasynyń múshesi, politsiia aǵa leitenanty Ermekqali Shoqaev, Ishki ister ministrligi «Tomiris» komandasynyń kapitany, politsiia maiory Ainagúl Baijigitova jáne QR Memlekettik kúzet qyzmetiniń kapitany, «Sardar A» komandasynyń múshesi Merlan Ultanbaev sóz sóiledi.
Sonymen qatar Prezident UAE SWAT Challenge saiysynda top jarǵan kúshtik qurylymdardyń bir top ofitserin marapattady.
