Memleket basshysy Quryq portynyń mýltimodaldy habyn tanystyrý rásimine qatysty, dep habarlaidy "Ult aqparat" Aqordaǵa silteme jasap.
Elbasy mýltimodaldy habtyń Besinshi Kaspii sammitiniń qarsańynda iske qosylýynyń simvoldyq mánine toqtalyp, bul jobanyń tek Qazaqstan úshin ǵana emes, sondai-aq búkil Eýraziia qurlyǵy úshin mańyzy zor ekenin aitty.
Nursultan Nazarbaev elimizdiń kólik-tranzit áleýetin damytýdyń mańyzdylyǵyna nazar aýdaryp, onyń Eýraziialyq qurlyqaralyq kólik júiesine qosylýy memleketimiz úshin strategiialyq mindet bolyp sanalatynyn atap ótti.
– Sońǵy jyldary 2,5 myń shaqyrymnan astam temir jol salynyp, 12 myń shaqyrym avtomobil joly qaita jóndeldi. Logistikalyq infraqurylym damyp keledi. Júk tasymaldaityn vagondar jańartylýda. «Batys Eýropa – Batys Qytai» avtomobil tranzittik dálizi iske qosyldy. Aqtaý porty jańartyldy. Qytaimen shekarada Qorǵas qurǵaq porty quryldy, – dedi Qazaqstan Prezidenti.
Memleket basshysy sońǵy on jylda Qazaqstannyń kólik-logistika júiesin damytý úshin tartylǵan investitsiia kólemi 30 milliard dollarǵa jetkenin jáne Quryq mýltimodaldy kesheni osy aýqymdy jumystyń mańyzdy bóligi bolyp sanalatynyn aitty.
– Búgin iske qosylǵan Quryq portynyń avtojol infraqurylymy kólik tranzitin damytý úshin jańa múmkindikterge jol ashady. Quryq arqyly ótetin Transkaspii baǵyty Qytaidan, Ortalyq Aziia elderi – Ózbekstan, Qyrǵyzstan, Tájikstan, sondai-aq Reseidiń Oral-Sibir óńirlerinen Túrkiia men Eýropaǵa jáne keri qarai júk tasymaldaýdyń tiimdi logistikasyn qamtamasyz etedi. Sonymen qatar, 2020 jylǵa qarai Qazaqstannyń tranzittik tasymaldan túsetin kirisin jylyna 5 milliard dollarǵa arttyrýǵa múmkindik beredi, – dedi Nursultan Nazarbaev.
Qazaqstan Prezidenti kólik infraqurylymyn damytý ekonomikanyń básekege qabilettiliginiń artýyna mýltiplikativti yqpal etetinin jáne qaita qalpyna kelgen Jibek joly arqyly ótetin saýda legine tyń serpin beretinin, sondai-aq óńirdegi yntymaqtastyqty keńeitýge jáne ekonomikanyń ilgerileýine septigin tigizetinin atap ótti.
– Búginde Mańǵystaý oblysy áýe, avtomobil joldary, temir jol jáne teńiz kólikteri jelisi toǵysqan iri kólik-logistika ortalyǵyna ainalyp otyr. Kaspiidegi eki zamanaýi port ózara birin-biri tolyqtyratyn bolady. Bul óńir úshin jańa múmkindikter beredi. Qyzmet kórsetý sektoryn ilgeriletip, transulttyq kompaniialardy tartý kerek, sondai-aq jańa tehnologiialardy paidalana otyryp, qaita óńdeitin óndiristi damytqan jón. Bulardyń bári týristik indýstriiany damytýǵa jol ashady. Bul aimaq ekonomikasyn diversifikatsiialaý úshin asa mańyzdy. Bizge osy múmkindikterdi tiimdi paidalaný kerek, – dedi Memleket basshysy.
Sońynda Elbasy Úkimetke oblys ákimdigimen birlesip, mýltimodaldy habtardyń – Aqtaý jáne Quryq porttarynyń bazasynda qosymsha óndirister men qyzmet kórsetý sektoryn damytý jónindegi keshendi jospar ázirleýdi tapsyrdy.
– Jergilikti atqarýshy organdar indýstriialyq jáne servistik óndiristerdi jańa jaǵdailarǵa beiimdeý úshin qajetti sharalardy qabyldaýy kerek. Sonymen qatar jańa jumys oryndaryn ashyp, kadrlardy jańa mamandyqtar boiynsha oqytýǵa jáne qaita daiarlaýǵa, sondai-aq óńirde shaǵyn jáne orta biznesti damytýǵa jaǵdai jasaý qajet, – dedi Nursultan Nazarbaev.
Qazaqstan Prezidenti elimiz úshin mańyzy zor jobalarǵa atsalysqandardyń bárine rizashylyq bildirip, kólik salasynyń eńbekkerlerin kásibi merekelerimen quttyqtady.
Memleket basshysy telekópir rejiminde «Quryq porty – «Tajen» shekaralyq keden beketi», «Quryq porty – «Qorǵas – Shyǵys qaqpasy» arnaiy ekonomikalyq aimaǵyndaǵy qurǵaq porty» mýltimodaldy baǵyttar boiynsha qatynaityn avtomobil jáne temir joldaryn iske qosty.
.jpeg)