Qasym-Jomart Toqaev Ulttyq biotehnologiia ortalyǵyna bardy, dep habarlaidy Aqorda.
Qazaqstan Prezidenti Ulttyq biotehnologiia ortalyǵyndaǵy otandyq ǵalymdardyń zertteý jumystarymen tanysty. Ortalyq qyzmetkerleri Memleket basshysyna DNQ jasandy sintez jolymen ázirlengen jáne juqpaly koronavirýs aýrýynyń jańa túrin jyldam anyqtaýǵa múmkindik beretin polimerazdy tizbekti reaktsiia (PTsR) negizindegi test júiesin tanystyrdy. Atalǵan test júiesi sheteldik diagnostikalyq qural-jabdyqtarmen salystyrý kezinde óziniń joǵary sezimtaldyǵyn kórsetken.
Qazirgi ýaqytta Qazaqstannyń biologiialyq qaýipsizdigin qamtamasyz etý qajettigin jáne COVID-19 virýsynyń ártúrli klimattyq jaǵdailarǵa beiimdelý qabiletin eskere otyryp, Ulttyq biotehnologiia ortalyǵy men Biologiialyq qaýipsizdik problemalary jónindegi ǵylymi-zertteý institýtynyń ǵalymdary koronavirýsqa qarsy vaktsina jasaý boiynsha birlesken jumystaryn bastap ketti.
Qasym-Jomart Toqaev biolog ǵalymdardyń eńbegin joǵary baǵalap, Qazaqstan ǵylymynyń quzyretin arttyrý úshin otandyq ázirlemelerdiń mańyzdylyǵyn atap ótti.
– Shyn máninde, bul zerthana Qazaqstan úshin biregei sanalady. Biz sizderdiń ǵylymi jumystaryńyzǵa zor úmit artamyz. Qajetti kómek beriledi. Virýs pen onyń taralýy biologiialyq laboratoriialardyń, meditsinalyq jáne sanitarlyq qyzmetterdiń jumystaryna memlekettiń erekshe kóńil bólýi tiis ekenin kórsetti, - dedi Memleket basshysy.
Prezident karantin talaptaryn saqtaý qajettigi jaiynda aitty.
– Men azamattarymyzdy karantin rejimin saqtaýǵa shaqyramyn. Biraq, eshqandai dúrbeleń týǵyzýǵa bolmaidy. Óitkeni indet ejelden optimizm men ómirge qushtarlyq saltanat qurǵan, adamdardyń jigeri muqalmaityn jerlerdi ainalyp ótedi. Sonymen qatar kimde-kim depressiiaǵa túsip, qaiǵyǵa salynatyn bolsa, infektsiia da soǵan úiir bolady. Sondyqtan bárimiz birge bolýymyz kerek. Al aýyrǵandarǵa keletin bolsaq, olardy eshqandai da shettetpeimiz. Barlyq qajetti emdeý sharalary júrgiziledi. Biz olarǵa da, karantinde jatqan azamattarǵa da qamqorlyq jasaimyz, - dedi Memleket basshysy.
Prezident Tótenshe jaǵdai jónindegi memlekettik komissiianyń otyrysynda aýqymdy is-qimyldar jospary jariialanǵanyn atap ótti. Ol boiynsha halyqqa, onyń ishinde, biznes ókilderine qarjylai kómek beriledi.
- Salyqtyq jeńildikter men kredit júktemelerin tómendetý sharalaryn eseptemegende, daǵdarysqa qarsy jumsalatyn qarjynyń jalpy kólemi 10 milliard dollardan asady. Bul - buryn-sońdy bolmaǵan soma. Bizdiń aldymyzda qazir osy qarajatty óte tiimdi jumsaý mindeti tur. Biz osy baǵyt boiynsha jumys isteimiz. Jaǵdai baqylaýda, azamattar memlekettiń qamqorlyǵyn sezinýde. Bul - bizdiń jumysymyzdyń negizgi basymdyǵy, - dep qorytyndylady Qasym-Jomart Toqaev.
Ortalyq jumysymen tanysý barysynda Bilim jáne ǵylym ministri Ashat Aimaǵambetov, Densaýlyq saqtaý ministri Eljan Birtanov, sondai-aq, Ulttyq biotehnologiia ortalyǵynyń bas direktory Erlan Ramanqulov baiandama jasady.
Buǵan deiin otandyq ǵylymi uiymdar qysqa merzim ishinde qus tumaýy men dońyz tumaýyna, nodýliarly dermatitke jáne brýtsellezge qarsy vaktsinalar ázirlegen bolatyn. Jalpy vaktsinanyń 28 túri jasalyp jáne diagnostikalyq test júiesiniń tehnologiialary ázirlendi. Munyń keibiri shet elge shyǵarylady.
