Qytai Halyq Respýblikasy Tóraǵasynyń Qazaqstanǵa memlekettik sapary aiaqtaldy. Qasym-Jomart Toqaev Si Tszinpindi áýejaidan shyǵaryp saldy, dep habarlaidy Aqordanyń baspasóz qyzmeti.
Búgin tús aýa Qazaqstan Prezidenti Qasym-Jomart Toqaev elimizge memlekettik saparmen kelgen Qytai Halyq Respýblikasynyń Tóraǵasy Si Tszinpindi elorda áýejaiynda kútip aldy.
Odan keiin Aqordada Qytai basshysy Si Tszinpindi saltanatty qarsy alý sharasy ótti.
Artynsha QR Prezidenti Qasym-Jomart Toqaev QHR Tóraǵasy Si Tszinpinmen kezdesý ótkizdi.
Kezdesýden soń Memleket basshysy Qazaqstan Respýblikasy men Qytai Halyq Respýblikasy arasyndaǵy ekijaqty saiasi, ekonomikalyq jáne mádeni qatynastardy nyǵaitýǵa jáne damytýǵa qosqan airyqsha úlesi úshin QHR Tóraǵasy Si Tszinpindi elimizdiń eń joǵary memlekettik nagradasy – «Altyn Qyran» ordenimen nagradtady.
