Foto: Aqorda
Prezident Qasym Jomart Toqaev Aqorda rezidentsiiasynda Qytai Halyq Respýblikasynyń Tóraǵasy Si Tszinpindi qarsy aldy. Budan soń memleketter basshylary kelissóz dóńgelek ústeline otyrdy, dep habarlaidy Ult.kz.
Memleket basshysynyń aitýynsha, QHR Tóraǵasy qazaq jerinde qai kezde de qadirli qonaq sanalǵan, al onyń bul jolǵy sapary – shynaiy ári myzǵymas dostyǵymyzdyń aiqyn kórinisi.
"Qytai Halyq Respýblikasy – Qazaqstannyń tatý kórshisi, jaqyn dosy jáne senimdi seriktesi. San qyrly qazaq-qytai yqpaldastyǵy Sizdiń jeke qoldaýyńyzben máńgi ári jan-jaqty strategiialyq áriptestik rýhynda jáne buryn-sońdy bolmaǵan qarqynmen damyp kele jatyr. Muny erekshe yqylaspen atap ótkim keledi. Ortaq tarihymyzǵa muqiiat úńilsek, elderimizdiń arasynda eshqandai túitkilder nemese tosqaýyldar bolmaǵan. Tek qana ózara dostyq pen yqpaldastyq, túsinistik pen jyly lebizder basym boldy. Qytai halqy qazaq halqyna eshqandai ziian keltirgen joq",– dedi Qazaqstan Prezidenti.
Memleket basshysy ekijaqty qarym-qatynas jyldan jylǵa nyǵaiyp, jańa «altyn kezeńge» qadam basqanyn málimdedi. Dostyq bailanys eki eldiń turaqty áleýmettik-ekonomikalyq damýyna jáne halyqtardyń ál-aýqatyn jaqsartýǵa zor septigin tigizip jatqanyna nazar aýdardy.
Prezident Qytaidy Qazaqstannyń tatý kórshisi jáne ýaqyt tezinen ótken senimdi strategiialyq seriktesi dep atady.
Memleket basshysynyń aitýynsha, eki eldiń qarym-qatynasy turaqty sipatqa ie ári oǵan geosaiasi syn-qaterler men dúrbeleńder, sondai-aq halyqaralyq ahýal teris áser etpeidi.
"Qytai Qazaqstanmen aradaǵy yntymaqtastyǵynda qandai da bir saiasi shart qoimaǵan. Bizdiń egemendigimiz ben qaýipsizdigimizge kórsetken qoldaýyńyzdy baǵalaimyz. Qytaidyń beibitshilik bastamalaryn qoldaimyz. Elińizdiń ádil álemdik tártip ornatý áreketterin qýattaimyz", – dedi Qazaqstan Prezidenti.
Memleket basshysy QHR-dyń Qazaqstannyń eń iri saýda-ekonomikalyq seriktesi ekenin eske saldy. Byltyrǵy qorytyndy boiynsha ekijaqty saýda-sattyq kólemi 44 milliard dollarǵa jetken. Bul – rekordtyq kórsetkish.
Qasym-Jomart Toqaev atom energetikasy salasyna arnaiy toqtaldy.
"Biz Qazaqstanda birneshe, tym bolmaǵanda eki-úsh AES salý týraly sheshim qabyldadyq. Osy mańyzdy jobaǵa iri kompaniialardy tartýǵa qatysty jumys júrgizilip jatyr. Qazaqstan Respýblikasynyń Atom energiiasy jónindegi agenttigi quryldy. AES qurylysy boiynsha Qytaidyń CNNC kompaniiasyn senimdi strategiialyq seriktes retinde qarastyryp otyrǵanymyzdy erekshe atap ótkim keledi. Álemge áigili kompaniia bizdiń naryqta óz ornyn tabatyny anyq. Sonymen qatar Qazaqstan Qytaiǵa tabiǵi ýran men iadrolyq otyn jetkizip otyrǵan senimdi el", – dedi Prezident.
Si Tszinpin qazaq jerinde kórsetilgen syi-qurmet úshin Prezidentke rizashylyǵyn bildirdi. Ol Qasym-Jomart Toqaevtyń basshylyǵymen Qazaqstan ulttyq jańǵyrý jolyna túskenin, el damýynda tyń tabystarǵa qol jetkizip kele jatqanyn atap ótti.
"Tatý kórshi ári strategiialyq seriktes retinde biz Sizderdiń jetistikterińizge tántimiz. Sizder úshin qýanyshtymyz. Qytai men Qazaqstannyń qarym-qatynasy qubylmaly álemniń synyna tótep berip, qarqyndy damyp keledi. Bul – tek geografiialyq turǵydan jaqyndyqtyń, ǵasyrlarǵa ulasqan dostyqtyń arqasy ǵana emes, elderimizdiń órkendeý jolyndaǵy tabiǵi suranysy. Sońǵy jyldary birlesken kúsh-jigerdiń nátijesinde taǵdyry ortaq Qytai men Qazaqstan arasyndaǵy yqpaldastyq jańa mán-mazmunmen tolyǵyp jatyr. Birqatar áleýmettik mańyzy bar jobalardyń júzege asyrylýy qos halyqqa aitarlyqtai paida ákeldi. Men Ózińizben tize qosyp, Qytai-Qazaqstan dostyǵyn nyǵaitýǵa, óńirdiń jáne jalpy álemniń damýyna eleýli úles qosý úshin eki eldiń san qyrly yntymaqtastyǵyn odan ári ilgeriletýge ázirmin", – dedi QHR Tóraǵasy.
Kelissóz barysynda eki el yntymaqtastyǵynyń barlyq baǵyt boiynsha perspektivasy talqylandy. Baiyrǵy dostyq pen ózara qurmetke arqa súiegen eki el basshylary emen-jarqyn áńgimelesti.
Prezident Qasym-Jomart Toqaev pen QHR Tóraǵasy Si Tszinpin júrgizgen kelissóz nátijesinde 24 úkimetaralyq jáne vedomstvoaralyq qujatqa qol qoiyldy.
Eki el delegatsiiasynyń músheleri energetika, aeroǵarysh, tsifrlandyrý, keden, aýyl sharýashylyǵy, elektrondy saýda, týrizm, ziiatkerlik menshik, meditsina, media, ǵylym, óńiraralyq bailanys salalaryndaǵy yntymaqtastyqty qamtityn qujattarmen almasty.
Olardyń ishinde investitsiialardy kótermeleý jáne ózara qorǵaý, tehnikalyq-ekonomikalyq yntymaqtastyq týraly úkimetaralyq kelisimder bar.
