Qazaqstan Prezidenti Qasym-Jomart Toqaev Halyqaralyq yntymaqtastyq jónindegi óziniń jańadan taǵaiyndalǵan Arnaýly ókili Erjan Qazyhanovpen kezdesý ótkizdi, dep habarlaidy Aqordanyń resmi saity.
Memleket basshysy Prezident Ákimshiliginiń qurylymynda osy jańa laýazymnyń bekitilýi jahandyq jáne óńirlik kún tártibiniń jyldam ózgerýi kezinde halyqaralyq yntymaqtastyq máselesine el basshylyǵy tarapynan erekshe nazar aýdarylatynyn atap ótti.
Prezident Arnaýly ókil qyzmetiniń basty basymdyqtary retinde COVID-19 pandemiiasynyń aýyr saldaryn eńserý, ulttyq ekonomikany jáne áleýmettik salany jedel qalpyna keltirý maqsatynda syrtqy resýrstardy tartý úshin sheteldik áriptestermen tyǵyz bailanystardy arttyrý qajettigine toqtaldy.
Osyǵan bailanysty kezdesýde tsifrlyq jáne jasyl tehnologiialarǵa basa mán berilip, ozyq investitsiialyq jobalardy iske asyrýda, kópjaqty qarjy-ekonomikalyq uiymdarmen yntymaqtastyqty arttyrýda, Dúniejúzilik saýda uiymy aiasynda jańartylǵan álemdik saýda arhitektýrasyn qalyptastyrýda Qazaqstannyń belsendi atsalysýy qajet ekenine nazar aýdaryldy.
Sonymen qatar Erjan Qazyhanovqa gýmanitarlyq sala, klimat diplomatiiasy, sondai-aq, Qazaqstannyń negizgi syrtqy saiasi bastamalaryn ilgeriletý siiaqty halyqaralyq yntymaqtastyqtaǵy mańyzdy mindetter júkteldi.
Joǵaryda atalǵan mindetterdi eskere otyryp, Qasym-Jomart Toqaev «halyq únine qulaq asatyn memleket» tujyrymdamasyn júzege asyrý barysynda otandyq jáne sheteldik zertteý ortalyqtarymen, Qazaqstannyń azamattyq qoǵamymen keri bailanys ornatýdyń mańyzdylyǵyn atap ótti.
Prezident Syrtqy ister ministri, Prezident kómekshisi, BUU jáne EQYU janyndaǵy QR turaqty ókili, Avstriiadaǵy, Ulybritaniia men AQSh-taǵy elshi siiaqty jaýapty qyzmetterdegi jumys tájiribesi E.Qazyhanovqa ózine júktelgen jańa mindetterdi abyroimen atqarýǵa septigin tigizetinine senim bildirdi.
