Foto: Aqorda
Prezident Qasym-Jomart Toqaev Antaliia diplomatiialyq forýmynyń «Mapping Tomorrow, Managing Uncertainties» paneldik sessiiasyna qatysty. Ol BUU men basqa da halyqaralyq institýttardy jetildirý jónindegi oiymen bólisti, dep habarlaidy Ult.kz.
– Biz óńirlik jáne jahandyq qaqtyǵystardy talqylaimyz. Alaida Siz Túrkiianyń burynǵy syrtqy ister ministri retinde kelissózder BUU men basqa da iri halyqaralyq uiymdar alańynda emes, odan tysqary jerlerde ótip jatqanyn ańǵarǵan shyǵarsyz. Taraptar BUU-da emes, belgili bir elderdiń astanalarynda, jekelegen konferents-zaldarda kezdesedi. BUU joǵary ókilderiniń qaqtyǵystarǵa araaǵaiyndyq jasaǵanyn kóre bermeimiz. Bul oilanatyn másele. Demek BUU-nyń róli tómendep ketti degen sóz. Men oǵan qatty alańdaimyn. Óitkeni ózim de BUU men basqa da halyqaralyq uiymdarda qyzmet ettim. Qazir jurt kelesi BUU Bas hatshysy kim bolady degen taqyrypty talqylap jatyr. Meniń oiymsha, bul asa mańyzdy emes. Eń basty túitkil, uiym qazirgi kúiinde ári qarai qyzmetin jalǵastyra ala ma? – dedi Prezident.
Qasym-Jomart Toqaev jasandy intellektiniń halyqaralyq uiymdar qyzmetine yqpalyn zerdeleýge shaqyryp, jahandyq Uiymdy túbegeili reformalaý qajet ekenine toqtaldy.
– Álginde aitqanymdai, óte ózekti halyqaralyq máselelerdiń sheshilýine Qaýipsizdik Keńesiniń ózi kedergi keltirip otyr. Bul oǵash, bálkim, aqylǵa syimaityn jaǵdai. Adamdar, diplomattar men saiasatkerler basqa alańdarda kelissóz júrgizýge májbúr. Aitpaqshy, bul problemany byltyr qyrkúiek aiynda ótken BUU Bas assambleiasynyń kezekti sessiiasynda Prezident Donald Tramp dál sipattady. Men onymen tolyq kelisemin. Ol BUU shtab-páterindegi buzylǵan telesýfler men eskalatordy synǵa alyp, «BUU-da bári isten shyqqan!» dedi. Alaida eń mańyzdy másele – Birikken Ulttar Uiymynda jáne basqa da halyqaralyq qurylymdarda beibitshilikti saqtaý úderisi toqyrap tur. Men – kópjaqty diplomatiianyń jaqtaýshysymyn. Beibitshilikke bastaityn ádildik ideiasynyń tóńiregine toptasqan adamzattyń jarqyn bolashaǵyna áli de senemin, – dedi Memleket basshysy.
