Foto: Zakon.kz
Qasym-Jomart Toqaev qazaqstandyqtardy Ulttyq kitap kúnimen quttyqtap, qazir qoǵam búgingi zamannyń ózekti máselelerine arnalǵan jariialanymdardy oqýǵa birtindep qaita bet buryp jatqanyn atap ótti, dep habarlaidy Ult.kz.
"Barshańyzdy Ulttyq kitap kúnimen quttyqtaimyn! Qazirgi kezeńde baspa isinde aýqymdy ózgerister bolyp jatyr. Soǵan qaramastan, kitap rýhani jáne adami qundylyqtardyń qainar kózi retinde eshqashan mán-mańyzyn joǵaltpaidy. Qazir qoǵamnyń kitap oqý mádenietine, sonyń ishinde klassikalyq kórkem shyǵarmalardy nemese búgingi zamannyń ózekti máselelerine arnalǵan jariialanymdardy oqýǵa birtindep qaita bet buryp jatqany baiqalady. Osy oń úrdis jastar arasynda da keńinen taralyp keledi. Jappai tsifrlandyrý jáne Jasandy Intellektiniń ústemdigi arta túsken ýaqytta oqý mádenieti ult sapasynyń birden-bir ólshemi retinde halqymyzdyń bitim-bolmysyna tán ainymas qasiet bolyp qala berýge tiis", – dep jazdy Qasym-Jomart Toqaev Instagram áleýmettik jelidegi paraqshasynda.
Memleket basshysy aldaǵy eki apta ishinde oqý mádenietin keńinen nasihattaý jáne oqýǵa qushtar, ziiatker ult qalyptastyrý sharalary týraly arnaýly Jarlyqqa qol qoiady.
