Qasym-Jomart Toqaev qazaqstandyqtardy Otan qorǵaýshy kúnimen quttyqtady, dep habarlaidy "Ult aqparat" Aqordanyń resmi saityna silteme jasap.
«Qurmetti qazaqstandyqtar!
Sizderdi Otan qorǵaýshy kúnimen shyn júrekten quttyqtaimyn!
Biz bul kúni Qarýly Kúshterimizdiń ardagerlerine jáne elimizdiń egemendigi men ulttyq múddesin qorǵap turǵan, antyna adal áskeri qyzmetshilerge qurmet kórsetemiz.
Qazaqstan jer júzine qashanda beibitshilikti jaqtaityn jáne jaýapkershiligi joǵary memleket retinde tanymal. Sondai-aq, ekonomikalyq, gýmanitarlyq múmkindikteri ǵana emes, áskeri áleýeti de myqty elge ainaldyq.
Tuńǵysh Prezident, Elbasy Nursultan Ábishuly Nazarbaevtyń orasan eńbeginiń arqasynda zamanaýi qarý-jaraqpen jáne jańa tehnikamen jabdyqtalǵan qýatty armiia jasaqtaldy. Qarýly Kúshterimizdiń barlyq qurylymynda qyzmet etetin sarbazdar men sardarlardyń jaýyngerlik rýhy, otanshyldyǵy, áskeri daiyndyǵy jáne kásibi mashyǵy elimizdiń qorǵanys qabiletiniń joǵary bolýyn qamtamasyz etedi.
Memleket týǵan jeri úshin aianbai eńbek etip, áskeri qyzmetke búkil ǵumyryn arnaǵan otansúigish perzentterin jan-jaqty qoldaýǵa airyqsha mán beredi. Bizdiń mindetimiz – jańa geosaiasi ahýalǵa sai elimizdiń qorǵanys qabiletin odan ári nyǵaita túsý.
Armiia – memlekettigimizdiń myzǵymas tiregi, Táýelsizdigimizdiń kepili. Qazaqstan Respýblikasynyń áskeri qyzmetshilerine halqymyzdyń qaýipsizdigi men beibit ómiri jolyndaǵy minsiz qyzmeti úshin rizashylyǵymdy bildiremin», - delingen quttyqtaýda.
