Memleket basshysy Parlament Palatalarynyń birlesken otyrysynda «Halyq birligi jáne júieli reformalar – el órkendeýiniń berik negizi» atty Joldaýyn jariialap, Qazaqstannyń aldaǵy damý strategiiasyn aiqyndap berdi, dep habarlaidy "Ult aqparat" Aqordaǵa silteme jasap.
Qasym-Jomart Toqaev pandemiiadan keiingi kezeńdegi eldi odan ári damytýǵa, densaýlyq saqtaý júiesiniń tiimdiligin arttyrýǵa, sapaly bilimmen qamtýǵa, óńirlik saiasatty jetildirýge, eńbek naryǵynda tiimdi ekojúie qurýǵa, saiasi jańǵyrýǵa, adam quqyǵyn qorǵaý men ultty uiystyrýǵa baǵyttalǵan bastamalaryn jariialady.
Prezident Qazaqstan halqyna Joldaýyn el Táýelsizdiginiń 30 jyldyǵyna arnalǵan sózderimen bastady.
– Biyl egemen el bolǵanymyzǵa 30 jyl tolyp otyr. Táýelsizdik – bizdiń eń qasterli qundylyǵymyz. Qazaqstan Tuńǵysh Prezidentimiz, Elbasynyń dara saiasatynyń arqasynda tabysty el retinde búkil álemge tanymal boldy. Eń basty jetistigimiz – birtutas el bolyp, jańa memleket qurdyq. Irgemizdi bekitip, eńsemizdi tiktedik. Halyqaralyq qaýymdastyqtyń beldi múshesine ainaldyq. Turaqty qoǵam qalyptastyryp, ornyqty damý jolyna tústik. Memlekettiligimizdi nyǵaitý úshin bir El bolyp eńbek etip jatyrmyz. Egemendik degenimiz – jalań uran men jalyndy sóz emes. Biz úshin eń mańyzdysy – ár azamattyń Táýelsizdik igiligin sezine alýy. Onyń basty kórinisi – eldegi beibit ómir, qoǵamdaǵy turaqtylyq pen tynyshtyq. Sondai-aq, halyqtyń turmys sapasynyń jaqsarýy jáne jastardyń bolashaqqa nyq senimmen qaraýy. Barlyq bastamamyz osyǵan baǵyttalýda, – dedi Prezident.
Memleket basshysy Joldaýdyń negizgi basymdyqtaryn aiqyndap, qazaqstandyqtardyń ál-aýqatyn arttyrý – óziniń Prezident retindegi basty maqsaty ekenin atap ótti.
Bul maqsatqa jetý úshin 5 negizgi bastama aityldy.
Birinshiden, Qasym-Jomart Toqaev 2022 jyldyń 1 qańtarynan bastap eń tómengi jalaqy mólsherin 42 500 teńgeden 60 myń teńgege deiin kóbeitý týraly sheshimin jariia etti. Bul shara 1 mln. adamdy tikelei qamtityn bolsa, eńbek etip júrgen barlyq azamattarǵa janama túrde áser etedi.
Ekinshiden, sońǵy 10 jylda kásiporyn ieleriniń tabysynan 60 paiyzǵa artta qalyp kelgen eńbekaqy qoryn kóterý qajettigin aitty. Osy oraida Úkimetke jumysshylardyń jalaqysyn kóterý úshin biznesti yntalandyrý sharalaryn ázirleýdi tapsyrdy. Jumysshylarynyń jalaqylaryn ósirgen jumys berýshilerge satyp alýlarda jeńildik qarastyrylyp, memlekettik qoldaýda basymdyq beriledi.
Úshinshiden, Memleket basshysy mikro jáne shaǵyn kásipkerliktiń eńbekaqy tóleý qorynan alynatyn biryńǵai tólem kólemin 34 paiyzdan 25 paiyzǵa deiin tómendetýdi usyndy. Bul biznestiń myńdaǵan qyzmetkerin «kóleńkeli ainalymnan» shyǵarýǵa, zeinetaqy, áleýmettik jáne meditsinalyq saqtandyrý júieleriniń tolyq qatysýshysy bolýyna yqpal etedi.
Tórtinshiden, Prezident 2022 jyldan 2025 jylǵa deiin mádeniet qyzmetkerleriniń, muraǵatshylardyń, kitaphanashylardyń, tehnikalyq qyzmetkerlerdiń, qoryqshylardyń, kólik júrgizýshileriniń jáne basqalardyń jalaqysyn jyl saiyn orta eseppen 20 paiyzǵa ósirýdi tapsyrdy. Bul bastamanyń igiligin tutastai alǵanda taǵy 600 myń qazaqstandyq kóredi.
Besinshiden, Qasym-Jomart Toqaev zeinetaqy qoryndaǵy jinaqtyń alýǵa bolatyn bóligin «Otbasy banktegi» esepshotqa aýdaryp, sol arqyly baspana satyp alýǵa ruqsat berý kerek dep sanaidy. Onyń aitýynsha, bul qarjyny durys jinap, saýatty paidalaný daǵdysyna úiretedi.
Prezident birlesken otyrysqa qatysqan Parlament depýtattaryna árbir zań jobasynyń qyr-syryna tereń úńilip, ony sapaly daiyndaýǵa shaqyrdy. Halyqtyń múddesin qorǵaý jolynda árdaiym tabandylyq tanytýy kerek ekenine erekshe toqtaldy. Memleket basshysynyń aitýynsha, árbir sheshim eldiń suranysyn da, memlekettiń múmkindigin de eskere otyryp qabyldanýy qajet.
Qasym-Jomart Toqaev sóz sońynda memlekettik apparattyń tiimdi jumys isteýi qajet ekenin eske saldy.
– Memleket basshysynyń saiasatyna kúmánmen qaraityndar, jumysyn atqara almaityndar, ýaqyt ótkizip bosqa otyratyndar men Prezidenttiń tapsyrmalaryn oryndaýdan jaltaratyndar bolsa, qyzmet oryndaryn bosatýlary kerek. Biz qazir damýymyzdyń sheshýshi kezeńine qadam bastyq. Memlekettik apparat birtutas mehanizmdei jumylyp jumys isteýge mindetti. Tek sonda ǵana biz maqsatymyzǵa jete alamyz, – dedi Prezident.
