مەملەكەت باسشىسى پارلامەنت پالاتالارىنىڭ بٸرلەسكەن وتىرىسىندا «حالىق بٸرلٸگٸ جەنە جٷيەلٸ رەفورمالار – ەل ٶركەندەۋٸنٸڭ بەرٸك نەگٸزٸ» اتتى جولداۋىن جارييالاپ, قازاقستاننىڭ الداعى دامۋ ستراتەگيياسىن ايقىنداپ بەردٸ, دەپ حابارلايدى "ۇلت اقپارات" اقورداعا سٸلتەمە جاساپ.
قاسىم-جومارت توقاەۆ پاندەمييادان كەيٸنگٸ كەزەڭدەگٸ ەلدٸ ودان ەرٸ دامىتۋعا, دەنساۋلىق ساقتاۋ جٷيەسٸنٸڭ تيٸمدٸلٸگٸن ارتتىرۋعا, ساپالى بٸلٸممەن قامتۋعا, ٶڭٸرلٸك ساياساتتى جەتٸلدٸرۋگە, ەڭبەك نارىعىندا تيٸمدٸ ەكوجٷيە قۇرۋعا, ساياسي جاڭعىرۋعا, ادام قۇقىعىن قورعاۋ مەن ۇلتتى ۇيىستىرۋعا باعىتتالعان باستامالارىن جارييالادى.
پرەزيدەنت قازاقستان حالقىنا جولداۋىن ەل تەۋەلسٸزدٸگٸنٸڭ 30 جىلدىعىنا ارنالعان سٶزدەرٸمەن باستادى.
– بيىل ەگەمەن ەل بولعانىمىزعا 30 جىل تولىپ وتىر. تەۋەلسٸزدٸك – بٸزدٸڭ ەڭ قاستەرلٸ قۇندىلىعىمىز. قازاقستان تۇڭعىش پرەزيدەنتٸمٸز, ەلباسىنىڭ دارا ساياساتىنىڭ ارقاسىندا تابىستى ەل رەتٸندە بٷكٸل ەلەمگە تانىمال بولدى. ەڭ باستى جەتٸستٸگٸمٸز – بٸرتۇتاس ەل بولىپ, جاڭا مەملەكەت قۇردىق. ٸرگەمٸزدٸ بەكٸتٸپ, ەڭسەمٸزدٸ تٸكتەدٸك. حالىقارالىق قاۋىمداستىقتىڭ بەلدٸ مٷشەسٸنە اينالدىق. تۇراقتى قوعام قالىپتاستىرىپ, ورنىقتى دامۋ جولىنا تٷستٸك. مەملەكەتتٸلٸگٸمٸزدٸ نىعايتۋ ٷشٸن بٸر ەل بولىپ ەڭبەك ەتٸپ جاتىرمىز. ەگەمەندٸك دەگەنٸمٸز – جالاڭ ۇران مەن جالىندى سٶز ەمەس. بٸز ٷشٸن ەڭ ماڭىزدىسى – ەر ازاماتتىڭ تەۋەلسٸزدٸك يگٸلٸگٸن سەزٸنە الۋى. ونىڭ باستى كٶرٸنٸسٸ – ەلدەگٸ بەيبٸت ٶمٸر, قوعامداعى تۇراقتىلىق پەن تىنىشتىق. سونداي-اق, حالىقتىڭ تۇرمىس ساپاسىنىڭ جاقسارۋى جەنە جاستاردىڭ بولاشاققا نىق سەنٸممەن قاراۋى. بارلىق باستامامىز وسىعان باعىتتالۋدا, – دەدٸ پرەزيدەنت.
مەملەكەت باسشىسى جولداۋدىڭ نەگٸزگٸ باسىمدىقتارىن ايقىنداپ, قازاقستاندىقتاردىڭ ەل-اۋقاتىن ارتتىرۋ – ٶزٸنٸڭ پرەزيدەنت رەتٸندەگٸ باستى ماقساتى ەكەنٸن اتاپ ٶتتٸ.
بۇل ماقساتقا جەتۋ ٷشٸن 5 نەگٸزگٸ باستاما ايتىلدى.
بٸرٸنشٸدەن, قاسىم-جومارت توقاەۆ 2022 جىلدىڭ 1 قاڭتارىنان باستاپ ەڭ تٶمەنگٸ جالاقى مٶلشەرٸن 42 500 تەڭگەدەن 60 مىڭ تەڭگەگە دەيٸن كٶبەيتۋ تۋرالى شەشٸمٸن جارييا ەتتٸ. بۇل شارا 1 ملن. ادامدى تٸكەلەي قامتيتىن بولسا, ەڭبەك ەتٸپ جٷرگەن بارلىق ازاماتتارعا جاناما تٷردە ەسەر ەتەدٸ.
ەكٸنشٸدەن, سوڭعى 10 جىلدا كەسٸپورىن يەلەرٸنٸڭ تابىسىنان 60 پايىزعا ارتتا قالىپ كەلگەن ەڭبەكاقى قورىن كٶتەرۋ قاجەتتٸگٸن ايتتى. وسى ورايدا ٷكٸمەتكە جۇمىسشىلاردىڭ جالاقىسىن كٶتەرۋ ٷشٸن بيزنەستٸ ىنتالاندىرۋ شارالارىن ەزٸرلەۋدٸ تاپسىردى. جۇمىسشىلارىنىڭ جالاقىلارىن ٶسٸرگەن جۇمىس بەرۋشٸلەرگە ساتىپ الۋلاردا جەڭٸلدٸك قاراستىرىلىپ, مەملەكەتتٸك قولداۋدا باسىمدىق بەرٸلەدٸ.
ٷشٸنشٸدەن, مەملەكەت باسشىسى ميكرو جەنە شاعىن كەسٸپكەرلٸكتٸڭ ەڭبەكاقى تٶلەۋ قورىنان الىناتىن بٸرىڭعاي تٶلەم كٶلەمٸن 34 پايىزدان 25 پايىزعا دەيٸن تٶمەندەتۋدٸ ۇسىندى. بۇل بيزنەستٸڭ مىڭداعان قىزمەتكەرٸن «كٶلەڭكەلٸ اينالىمنان» شىعارۋعا, زەينەتاقى, ەلەۋمەتتٸك جەنە مەديتسينالىق ساقتاندىرۋ جٷيەلەرٸنٸڭ تولىق قاتىسۋشىسى بولۋىنا ىقپال ەتەدٸ.
تٶرتٸنشٸدەن, پرەزيدەنت 2022 جىلدان 2025 جىلعا دەيٸن مەدەنيەت قىزمەتكەرلەرٸنٸڭ, مۇراعاتشىلاردىڭ, كٸتاپحاناشىلاردىڭ, تەحنيكالىق قىزمەتكەرلەردٸڭ, قورىقشىلاردىڭ, كٶلٸك جٷرگٸزۋشٸلەرٸنٸڭ جەنە باسقالاردىڭ جالاقىسىن جىل سايىن ورتا ەسەپپەن 20 پايىزعا ٶسٸرۋدٸ تاپسىردى. بۇل باستامانىڭ يگٸلٸگٸن تۇتاستاي العاندا تاعى 600 مىڭ قازاقستاندىق كٶرەدٸ.
بەسٸنشٸدەن, قاسىم-جومارت توقاەۆ زەينەتاقى قورىنداعى جيناقتىڭ الۋعا بولاتىن بٶلٸگٸن «وتباسى بانكتەگٸ» ەسەپشوتقا اۋدارىپ, سول ارقىلى باسپانا ساتىپ الۋعا رۇقسات بەرۋ كەرەك دەپ سانايدى. ونىڭ ايتۋىنشا, بۇل قارجىنى دۇرىس جيناپ, ساۋاتتى پايدالانۋ داعدىسىنا ٷيرەتەدٸ.
پرەزيدەنت بٸرلەسكەن وتىرىسقا قاتىسقان پارلامەنت دەپۋتاتتارىنا ەربٸر زاڭ جوباسىنىڭ قىر-سىرىنا تەرەڭ ٷڭٸلٸپ, ونى ساپالى دايىنداۋعا شاقىردى. حالىقتىڭ مٷددەسٸن قورعاۋ جولىندا ەردايىم تاباندىلىق تانىتۋى كەرەك ەكەنٸنە ەرەكشە توقتالدى. مەملەكەت باسشىسىنىڭ ايتۋىنشا, ەربٸر شەشٸم ەلدٸڭ سۇرانىسىن دا, مەملەكەتتٸڭ مٷمكٸندٸگٸن دە ەسكەرە وتىرىپ قابىلدانۋى قاجەت.
قاسىم-جومارت توقاەۆ سٶز سوڭىندا مەملەكەتتٸك اپپاراتتىڭ تيٸمدٸ جۇمىس ٸستەۋٸ قاجەت ەكەنٸن ەسكە سالدى.
– مەملەكەت باسشىسىنىڭ ساياساتىنا كٷمەنمەن قارايتىندار, جۇمىسىن اتقارا المايتىندار, ۋاقىت ٶتكٸزٸپ بوسقا وتىراتىندار مەن پرەزيدەنتتٸڭ تاپسىرمالارىن ورىنداۋدان جالتاراتىندار بولسا, قىزمەت ورىندارىن بوساتۋلارى كەرەك. بٸز قازٸر دامۋىمىزدىڭ شەشۋشٸ كەزەڭٸنە قادام باستىق. مەملەكەتتٸك اپپارات بٸرتۇتاس مەحانيزمدەي جۇمىلىپ جۇمىس ٸستەۋگە مٸندەتتٸ. تەك سوندا عانا بٸز ماقساتىمىزعا جەتە الامىز, – دەدٸ پرەزيدەنت.
