Memleket basshysy Qasym-Jomart Toqaev Úkimettiń keńeitilgen otyrysyn ótkizdi, dep habarlaidy "Ult aqparat" Aqordaǵa silteme jasap.
Jiynǵa Premer-Ministr, Prezident Ákimshiliginiń Basshysy, Úkimet músheleri, Nur-Sultan, Almaty, Shymkent qalalary men oblystardyń ákimderi, Qazaqstan Prezidentine tikelei baǵynyshty ortalyq memlekettik organdardyń basshylary qatysty.
Otyrysty ashqan Qasym-Jomart Toqaev biylǵy birinshi jartyjyldyǵyndaǵy elimizdiń áleýmettik-ekonomikalyq damý qorytyndylaryna toqtaldy.
– Qańtar-maýsym aralyǵynda jaqsy kórsetkishterge qol jetkizdik dep aitýǵa bolady. Atap aitsaq, ekonomikalyq ósim 4,1 paiyzdy qurady. Infliatsiianyń jyldyq kórsetkishi 5,4 paiyz boldy. Negizgi kapitalǵa salynǵan investitsiialardyń kólemi 11,7 paiyzǵa ósti. Árine, atalǵan ekonomikalyq kórsetkishterdiń barlyǵy halyqtyń turmysyna oń yqpal etýi tiis, – dedi Memleket basshysy.
Jiyn barysynda Premer-Ministr A.Mamin, Ulttyq banktiń tóraǵasy E.Dosaev, Indýstriia jáne infraqurylymdyq damý ministri R.Skliar, Eńbek jáne halyqty áleýmettik qorǵaý ministri B.Saparbaev, Aýyl sharýashylyǵy ministri S.Omarov, Túrkistan oblysynyń ákimi Ó.Shókeev, Qaraǵandy oblysynyń ákimi E.Qoshanov jáne Atyraý oblysynyń ákimi N.Noǵaev baiandama jasady.
Qazaqstan Prezidenti spikerlerdiń nazaryn bank sektoryndaǵy máselelerge, qiyn jaǵdaiǵa tap bolǵan azamattardyń tutyný kreditterine qatysty qaryz júktemelerin tómendetý sharalaryn júzege asyrý mindetine aýdardy. Sondai-aq, kommýnaldyq qyzmet kórsetý jáne turǵyn úi qoryn basqarý máseleleri boiynsha turǵyndar tarapynan túsken aryz-shaǵymdardyń kóptigin atap kórsetti.
Memleket basshysy Túrkistan oblysynyń ákimi Ó.Shókeevtiń baiandamasyna toqtalyp, óz tapsyrmasy boiynsha qajetti qarjy bólingenin aitty.
– Ýaqyt óte tyǵyz. Biz bul jumystardy qysqa merzim ishinde aiaqtaýymyz kerek. Elimizdiń azamattary, memlekettik organdar, úkimettik emes uiymdar, óńirler, otandyq biznes jáne birqatar sheteldik investorlar zardap shekkenderge materialdyq jáne moraldyq qoldaý kórsetti. Bul – halqymyzdyń bereke-birliginiń arqasy jáne tutastyǵymyzdyń kórinisi. Bárine zor rizashylyǵymdy bildiremin, – dedi Qazaqstan Prezidenti.
Qasym-Jomart Toqaev Qorǵanys ministrligine áskeri qoimalardy kóshirý jumystaryn shuǵyl túrde bitirý qajet ekenin aitty.
Memleket basshysy Arystaǵy jarylysqa kinálilerdiń barlyǵyn jazalaýdy tapsyrdy. Sondai-aq, áskeri vedomstvoǵa baqylaýdy álsiretkeni jáne jarylysqa jol berilgeni úshin Qorǵanys ministri N.Ermekbaevqa qatań sógis jariialady.
– Qazir oqiǵany zertteý úshin arnaiy komissiia jumys istep jatyr. Komissiia jumysynyń qorytyndysy boiynsha Prezident Ákimshiligi men Qaýipsizdik Keńesi kinálilerdiń bárin qatań jazalaý jóninde usynys engizýi qajet. Bul qaýiptiligi joǵary nysandarǵa jaqyn jerge qurylys jumystaryn júrgizýge ruqsat bergen azamattyq memlekettik qyzmetshilerge de qatysty. Kinálilerdiń bári qatań jaýapqa tartylyp, jazalanýy tiis, – dedi Qasym-Jomart Toqaev.
Qazaqstan Prezidenti 20 tamyzǵa deiin basqa da osyndai nysandarǵa egjei-tegjeili taldaý jasaý úshin Qorǵanys ministrligine, sondai-aq, eskertýler men tótenshe jaǵdailardy joiýǵa jaýaptylardyń fýnktsionaldyq daiyndyqtaryn jáne qyzmettiń tiimdiligin arttyrý jóninde Úkimetke tapsyrma berdi.
Baiandamalardy tyńdaǵan Memleket basshysy Úkimettiń, Ulttyq banktiń jáne óńirler ákimderiniń jumystaryna oń baǵa berdi. Qasym-Jomart Toqaev qorytyndy sózinde baǵdarlamalyq qujattar men sailaýaldy baǵdarlamanyń júzege asyrylý tiimdiligin arttyrý qajettigin aitty.
Sonymen qatar, Memleket basshysy sailaýaldy baǵdarlamany júzege asyrý úshin jasalǵan Úkimettiń jobalyq ofisiniń jumysymen tanysty. Qasym-Jomart Toqaevqa Jobalyq ofisti uiymdastyrýdyń negizgi joldary, basym baǵyttary, maqsattary men mindetteri jóninde málimet berildi.
Memleket basshysy baiandamasynyń tolyq mátinin myna silteme boiynsha oqi alasyzdar.
