Qaraǵandy oblysyna jumys saparymen kelgen Qazaqstan Prezidenti Qasym-Jomart Toqaev jańadan salynǵan 1 200 oryndyq mektep-gimnaziiany aralap kórdi, dep haiýarlaidy "Ult aqparat" Aqordanyń baspasóz qyzmetine silteme jasap.
Jańa bilim oshaǵyna jaqyn jerlerdegi qazaq mektepterinen 900 oqýshy aýystyrylǵan. Bul úsh aýysymda oqytý máselesin sheshýge baǵyttalǵan mańyzdy qadam bolyp otyr.
Qasym-Jomart Toqaev mekteptegi oqý-tárbie jumystarynyń uiymdastyrylýymen tanysyp, bastaýysh synyp oqýshylary oqityn kezekshi synyptardy aralady.
Memleket basshysyna zamanaýi quraldarmen jabdyqtalǵan kabinetter, STEM-laboratoriia, robot tehnikasy jáne ziiatkerlik bólmeler, mektep telestýdiiasy men mediastýdiia kórsetildi. Mektepte sabaqtan tys uiymdastyrylatyn úiirme jumystary úshin ART-stýdiia jáne horeografiia zaly salynǵan.
Prezident jańa mektep-gimnaziiaǵa Abaidyń esimin berý jónindegi usynysty qoldady. Oqý oshaǵy uly aqyn ári oishyldyń muralaryn zertteý, nasihattaý ortalyǵyna ainalady. Mektep bazasynda qalalyq qana emes, oblystyq is-sharalar da ótkiziledi. Ol úshin 700 oryndyq akt zaly bar. Onyń ishi Abai shyǵarmashylyǵymen bezendirilgen.
Sonymen qatar Prezidentke koronavirýs pandemiiasy kezindegi oqý úderisiniń uiymdastyrylýy jóninde málimet berildi. Jańa oqý jylynda óńirdegi 504 mektepte 204 myń oqýshy, sonyń ishinde, 22 myń birinshi synyp oqýshysy bilim alýda.
Kontingenti 300-den aspaityn 279 mektep shtattyq rejimde jumys istep jatyr. Mundai oqý oryndarynda 29 myńǵa jýyq oqýshy oqidy. Bastaýysh jáne besinshi synyp oqýshylary úshin 6166 kezekshi synyptar uiymdastyrǵan. Bul synyptarda 77 myńnan astam bala oqyp jatyr. Búkil bilim berý mekemelerinde sanitarlyq rejim barynsha kúsheitilgen.
