Foto: Aqorda
Qasym-Jomart Toqaev Qaraǵandy oblysynyń ákimi Ermaǵanbet Bólekpaevty qabyldap, óńirdiń áleýmettik-ekonomikalyq damýy týraly esep tyńdady, dep habarlaidy Ult.kz.
Ákimniń málimetinshe, biylǵy segiz aida oblysta 3,2 trillion teńgeniń ónerkásip ónimi óndirilgen. Bul kórsetkish ótken jyldyń sáikes kezeńinen 7 paiyzǵa joǵary. Ásirese metallýrgiia, mashina jasaý, aýyl sharýashylyǵy, jeńil jáne tamaq ónerkásibinde turaqty ósim baiqalady.
Investitsiia kólemi de artyp keledi. Negizgi kapitalǵa 644,7 milliard teńge tartylyp, ósim 11,1 paiyzdy qurady. Jyl sońyna deiin quny 195 milliard teńgeni quraityn 29 investitsiialyq joba iske asyrylyp, 2 700-den astam jańa jumys orny ashylmaq. Al 2030 jylǵa deiin jalpy quny 4,5 trillion teńgege baǵalanǵan 120 iri jobany júzege asyrý josparlanyp otyr. Bul bastama shamamen 20 myń adamdy jumyspen qamtýǵa múmkindik beredi.
Azyq-túlik qaýipsizdigin qamtamasyz etý úshin aýyl sharýashylyǵynda da iri jobalar qolǵa alynǵan. Eki jańa sút fermasynyń qurylysy aiaqtalǵan soń, óńir sútke degen suranysty tolyqtai óteidi.
Ákim Memleket basshysyna «Qarmet» AQ-nyń jumysy jóninde de baiandady. Kompaniia segiz aida óndiristi jańǵyrtýǵa 110 milliard teńge investitsiia salǵan. Sonyń nátijesinde shoiyn óndirý kólemi – 6 paiyzǵa, bolat – 6,9 paiyzǵa, ilemdeý – 5 paiyzǵa ósken. Kásiporynda jańa koksty batareialar, quiý-ilemdeý kesheni jáne suryptap ilemdeý tsehy iske qosylyp jatyr. Sonymen qatar óndiris kezeń-kezeńimen tabiǵi gazǵa kóshýde.
Shahtalardaǵy ahýal da jaqsarǵan: kómir óndirý kólemi 15 paiyzǵa artqan. Eńbek qaýipsizdigin kúsheitý boiynsha sharalar qolǵa alynǵan.
Prezident Qaraǵandy oblysynyń áleýmettik-ekonomikalyq damýyn odan ári jandandyrý jóninde birqatar tapsyrma berdi. Atap aitqanda, qalalar men eldi mekenderdi jylýmen turaqty qamtamasyz etý jáne «Qarmet» AQ kásipornyndaǵy óndiristik qaýipsizdikti arttyrý máselesine erekshe nazar aýdarýdy mindettedi.
