Qazaqstan Prezidenti Irannyń Syrtqy ister ministri Mohammad Djavad Zarifti qabyldady, dep habarlaidy "Ult aqparat" Aqordanyń resmi saityna silteme jasap.
Memleket basshysy elordaǵa saparmen kelgen Iran diplomatyna iltipat bildirip, eki el arasyndaǵy bailanystardyń dostyq sipatyn atap ótti.
– Iran – Qazaqstannyń Taiaý Shyǵystaǵy mańyzdy seriktesteriniń biri. Zaman qalai qubylsa da, elderimiz arasyndaǵy jaqsy qarym-qatynastar úzilgen joq. Halyqaralyq ahýal ózara yntymaqtastyǵymyzdyń damýyna áser etpedi. Biz bul jaǵdaidy joǵary baǵalaimyz. Osy múmkindikti paidalana otyryp, Iran Prezidenti Hasan Rýhaniǵa júrekjardy sálemimdi joldaimyn, – dedi Qasym-Jomart Toqaev.
Óz kezeginde Mohammad Djavad Zarif Qazaqstan Prezidentiniń qonaqjailyq tanytqanyna alǵys aityp, Nur-Sultan qalasyna taǵy da kelýge qýanyshty ekenin atap ótti.
Syrtqy ister ministri Iran Prezidenti Hasan Rýhanidiń sálemi men Naýryz merekesine bailanysty quttyqtaýyn jetkizdi. Sondai-aq Hasan Rýhanidiń Qazaqstan Prezidenti Qasym-Jomart Toqaevty ózine yńǵaily ýaqytta Iranǵa resmi saparmen kelýge shaqyrǵanyn naqtylady.
– Biz Sizdiń elińizben aradaǵy yntymaqtastyqtyń damýyna zor mán beremiz. Qazaqstan óńirdegi jaqyn kórshilerimizdiń ári dostas memleketterimizdiń biri, – dedi Mohammad Djavad Zarif.
Kezdesý barysynda taraptar ekijaqty yntymaqtastyqty talqylap, óńirlik jáne jahandyq kún tártibindegi ózekti máseleler boiynsha pikir almasty.
