Memleket basshysy Frantsiia biznesiniń ókilderimen kezdesti, dep habarlaidy "Ult aqparat" Aqordaǵa silteme jasap.
Qasym-Jomart Toqaev óz sózinde Frantsiia Qazaqstannyń Eýropalyq odaq aiasyndaǵy negizgi seriktesi ekenin jáne elimizdiń ekijaqty yqpaldastyqty damytýǵa basa mán beretinin aitty.
– Eki memleket arasyndaǵy ózara qarym-qatynastar turaqty ári joǵary deńgeide. Biz Frantsiia Prezidenti Emmaniýel Makronnyń Qazaqstanǵa jasaityn aldaǵy sapary ekijaqty yntymaqtastyqty damytýǵa tyń serpin beredi dep sanaimyz, – dedi Memleket basshysy.
Qazirgi ýaqytta Qazaqstanda frantsýz kapitalynyń qatysýymen Orano, Alstom, Air Liquide, Airbus siiaqty 160-tan astam transulttyq kompaniia jumys isteidi. 2018 jyly elderimiz arasyndaǵy taýar ainalymy 32 paiyzǵa artyp, 4,5 milliard dollarǵa jetti.
– Men muny jaqsy kórsetkish dep esepteimin. Soǵan qaramastan ony jaqsartýǵa únemi umtylýymyz kerek. Biylǵy kórsetkishterde de oń qarqyn baiqalady. 9 aidyń ishinde taýar ainalymy 5,5 paiyzǵa ósip, 3,4 milliard dollarǵa jetti. Jalpy Qazaqstan ekonomikasyna salynǵan frantsýz investitsiiasynyń kólemi 16 milliard dollarǵa jýyq, – dedi Prezident.
Qasym-Jomart Toqaev Qazaqstanda tabysty biznes júrgizý úshin jaǵdai jasalǵanyn atap ótip, biznes-ahýaldy jaqsartýǵa, kedergilerdi azaitýǵa jáne elimizdiń investitsiialyq tartymdylyǵyn jaqsartýǵa baǵyttalǵan júieli reformalar júzege asyrylyp jatqanyn aitty.
Prezident frantsýz biznesmenderiniń nazaryn eki el arasyndaǵy yntymaqtastyqty nyǵaitýǵa negizdelgen kóptegen baǵyttarǵa aýdaryp, olardy agroónerkásiptik keshen jáne ekonomikanyń basqa da sektorlaryndaǵy birlesken jobalardy júzege asyrý úshin seriktes bolýǵa shaqyrdy.
– Qazaqstannyń básekege qabiletti aýyl sharýashylyǵy ónimderin óndirýde múmkindigi zor. Elimizde 25 million gektar egistik pen 186 million gektardan astam jaiylymdyq jer bar. Bul - orasan zor resýrs jáne rezerv. Geografiialyq turǵydan biz úlken ári joǵary tólemqabilettiligi bar Qytai, Eýropa, Taiaý Shyǵys jáne Indiia naryqtaryna jaqynbyz, – dedi Memleket basshysy.
Qazaqstan Prezidenti óz sózinde innovatsiia, tsifrlyq ekonomika salalaryndaǵy yntymaqtastyqtyń mańyzy zor ekenin atap ótti. Qasym-Jomart Toqaev qarjy sektoryndaǵy is-qimyldardy keńeitýge jáne «Astana» halyqaralyq qarjy ortalyǵynyń jumysyna qatysýǵa shaqyrdy.
– Elimizde Nazarbaev Ýniversiteti jáne Innovatsiialyq tehnologiialar parki sekildi innovatsiialyq klasterler jumys isteidi. Astana Hub IT-startaptar halyqaralyq tehnoparki ashyldy. Biz Qazaqstanda frantsýzdyq innovatsiialar men tehnologiialardy engizý úshin meilinshe qolaily jaǵdai jasaýǵa daiynbyz, – dedi Prezident.
Kólik-tranzit infraqurylymyn damytý máselesine toqtalǵan Memleket basshysy Qazaqstan arqyly Aziia men Eýropany jalǵaityn halyqaralyq kólik dálizi ótetinin, Qytaidyń «Bir beldeý, bir jol» jahandyq bastamasymen ushtasatyn «Nurly jol» baǵdarlamasynyń júzege asyrylyp jatqanyn aitty. Budan bólek kóliktik jáne týristik áleýetti arttyrý maqsatynda elimizdiń jetekshi áýejailarynda «ashyq aspan» júiesi engizildi.
– Men Qazaqstannyń aspany ashyq bolýy kerek degen sheshim qabyldadym. Osy júie 11 áýejaiǵa engizilip, barlyq áýe kompaniialary arasynda, onyń ishinde qazaqstandyqtar da bar, tiisti básekelestik uiymdastyrylady. Bul jolaýshylar tasymaly turǵysynan ǵana emes, sondai-aq, Qazaqstan men Eýropa arasynda júk tasymalyn uiymdastyratyn elimizdiń aviatsiialyq múmkindikterine oń yqpal etedi, – dedi Qasym-Jomart Toqaev.
Prezident Frantsiianyń týrizm salasyndaǵy tabysty tájiribesin zertteýge jáne engizýge elimizdiń múddeliligin atap ótip, Qazaqstannyń frantsiialyq týristerdi qabyldaýǵa daiyn ekenin málimdedi.
Qazaqstan-Frantsýz iskerlik keńesiniń teń tóraǵasy Iv-Lýi Darrikarrer investorlardyń birlesken jobalardy damytýǵa nietti ekenin jetkizdi.
– Men frantsýz kompaniialarynyń Qazaqstannyń kásiporyndarymen uzaq merzimge negizdelgen yntymaqtastyqty damytýǵa nietti ekenin aitqym keledi. Olar qosymsha jobalardy damytýǵa úmitti jáne qazaqstandyq bilikpen jumys isteýge ázir, – dedi Iv-Lýi Darrikarrer.
Kezdesý barysynda Qazaqstandaǵy Total kompaniiasynyń basshysy Alem Friga-Noi, Air Liquide kompaniiasynyń vitse-prezidenti Filipp Kristodolý, Alstom kompaniiasynyń Taiaý Shyǵys elderi boiynsha aǵa vitse-prezidenti Dide Flejer, Renault kásipornynyń aǵa vitse-prezidenti Nikolia Mor, Idemia kompaniiasynyń aǵa vitse-prezidenti Izabel Lozon, Orano mining kompaniiasynyń bas direktory Nikolia Maes, Vicat kompaniiasynyń aimaqtyq direktory Petro Kala jáne basqa da frantsýz biznesiniń ókilderi sóz sóiledi.
Kezdesý sońynda Qasym-Jomart Toqaev osy is-sharanyń Qazaqstan men Frantsiia arasyndaǵy bailanystardy nyǵaitýǵa septigin tigizetinine, ózara tiimdi jańa jobalardyń bastaýy bolatynyna senim bildirdi.
