Memleket basshysy Eýropalyq qaita qurý jáne damý bankiniń prezidenti Odil Reno-Bassomen kezdesti, dep habarlaidy "Ult aqparat" Aqordaǵa silteme jasap.
Kezdesý barysynda Eýropalyq qaita qurý jáne damý bankiniń Qazaqstanda atqarǵan jumystarynyń nátijeleri men yntymaqtastyqty odan ári nyǵaitýdyń basymdyqtary talqylandy.
Qasym-Jomart Toqaev Odil Reno-Bassoǵa iltipat bildirip, aqpan aiynda onlain rejimde ótkizgen kezdesýde ózara jemisti áńgime órbitkenin, alaida onyń Qazaqstan men EQDB arasyndaǵy yntymaqtastyq máseleleri jóninde oi-pikir almasýǵa múmkindik beretin betpe-bet júzdesýdei bolmaitynyn atap ótti.
– Eýropalyq qaita qurý jáne damý banki – Qazaqstannyń strategiialyq seriktesi. Yntymaqtastyq ornatqan ýaqyttan beri sizdiń bank bizdiń ekonomikamyzǵa 8 milliard evrodan astam investitsiia salyp, 300-ge jýyq joba júzege asyryldy. Jalpy banktiń ártúrli salalardy, ásirese jańartylatyn qýat kózderi sektoryn belsendi qarjylandyrǵanyn bilemiz. Jańartylatyn qýat kózderi salasyndaǵy yntymaqtastyqty jalǵastyramyz dep senemiz, sondai-aq agroónerkásip kesheni baǵytyndaǵy jobalardy da júzege asyrý asa mańyzdy, – dedi Memleket basshysy.
Sonymen qatar kezdesýde koronavirýs pandemiiasy, qarjy jáne taýar naryqtaryndaǵy turaqsyzdyq siiaqty problemalardy qamtityn álemdik ekonomikanyń damýyna qatysty aýqymdy máseleler qarastyryldy.
EQDB prezidenti Odil Reno-Basso álemdik ekonomikanyń damýy men Qazaqstandaǵy ekonomikalyq ósim týraly óz boljamymen bólisti.
