Qazaqstan Respýblikasynyń Prezidenti Nursultan Nazarbaev Respýblikalyq biýdjettiń atqarylýyn baqylaý jónindegi esep komitetiniń tóraǵasy Nurmuhambet Ábdibekovti qabyldady, dep habarlaidy "Ult aqparat" Aqordanyń baspasóz qyzmetine silteme jasap.
Kezdesý barysynda N.Ábdibekov Nursultan Nazarbaevqa Esep komitetiniń 2017 jylǵy jumysynyń negizgi nátijeleri men aldaǵy kezeńdegi mindetteri jóninde baiandady.
Ótken jyldyń qorytyndysy boiynsha bul organ 354 nysanǵa 25 tekserý júrgizgen. Aýditorlyq is-sharalar nátijesinde qaitarylýǵa tiisti 307,3 milliard teńgeniń 198,5 milliardy ótelgenin málimdedi.
Nursultan Nazarbaev Esep komitetine «Memlekettik aýdit jáne qarjylyq baqylaý týraly» zań normalarynyń júzege asyrylýyn qamtamasyz etýdi tapsyrdy.
Sonymen qatar Qazaqstan Prezidenti biýdjet qarajatyn tiimdi paidalaný isine Esep komiteti tarapynan neǵurlym muqiiat baǵalaý júrgizýdiń mańyzdylyǵyna toqtalyp, zań buzýshylyqqa jol bermeý úshin júieli sharalar qarastyrý kerek ekenin aitty.
Memleket basshysy Esep komitetiniń óńirdegi tekserý komissiialarynyń jumysyn úilestirýde, sondai-aq olardyń qyzmetin jaqsartý jónindegi ádistemelik jáne tájiribelik usynymdardy ázirleý isinde mańyzdy ról atqaratynyn atap ótti.
Kezdesý sońynda Nursultan Nazarbaev memlekettik aýdit jáne qarjylyq baqylaý organdarynyń qyzmetin buǵan deiin qabyldanǵan normativtik quqyqtyq aktilerge jáne memlekettik baǵdarlamalarǵa sáikes jetildirý jóninde birqatar naqty tapsyrma berdi.
.jpeg)