Memleket basshysy Eńbek jáne halyqty áleýmettik qorǵaý ministri Serik Shápkenovti qabyldady, dep habarlaidy "Ult aqparat" Aqordanyń baspasóz qyzmetine silteme jasap.
Memleket basshysyna eńbek jáne áleýmettik saladaǵy qazirgi ahýal men onyń aldaǵy ýaqytta atqaratyn mindetteri týraly baiandaldy.
Serik Shápkenov Qasym-Jomart Toqaevqa ministrliktiń júrgizip jatqan jumystary, atap aitqanda, halyqtyń tabysy men eńbekaqyny arttyrýǵa, turǵyndardy jumyspen qamtýǵa, eńbek qatynastaryn retteýge jáne azamattardy zeinetaqymen qamtamasyz etýdi jetildirýge baǵyttalǵan jumystar boiynsha esep berdi.
Sonymen qatar ministr Prezidentke eńbek naryǵyndaǵy zamanaýi úrdister, kópbalaly jáne az qamtylǵan otbasylarǵa qoldaý kórsetý sharalary jóninde málimet berdi.
Kezdesý qorytyndysy boiynsha Qasym-Jomart Toqaev salalyq vedomstvo basshysyna birqatar naqty tapsyrma berdi.
