Foto: Aqorda
Qasym-Jomart Toqaev New Silk Way VII Halyqaralyq kólik-logistika biznes-forýmynyń ashylýymen quttyqtap, búgingi is-sharanyń mán-mańyzy erekshe ekenine toqtaldy, dep habarlaidy Ult.kz.
Prezident bul jobany Táýelsizdik jyldaryndaǵy eń aýqymdy temirjol qurylysy dep atap, onyń Qazaqstannyń tranzittik áleýetin aitarlyqtai arttyratynyn aitty.
– Bárimiz «Dostyq – Moiynty» temirjolynyń ekinshi jelisiniń resmi ashylýyna kýá bolyp otyrmyz. «Dostyq – Moiynty» joly – shyn máninde asa mańyzdy infraqurylym jobasy. Bul joba Qazaqstannyń kólik-logistika júiesiniń damýyna, onyń tiimdiligin nyǵaitýǵa airyqsha serpin beretini sózsiz. Al tarihymyzǵa úńilsek, osydan otyz bes jyl buryn «Dostyq – Alashańqai» jobasy iske qosyldy. Qazaqstan men Qytaidyń temirjoly toǵysty. Bul elimiz úshin tarihi oqiǵa boldy. Sol joldy salǵan ardagerlerimiz qazir osy jiynǵa qatysyp otyr. Barshańyzǵa zor alǵysymdy aitamyn. Men halyqqa Joldaýymda, kólik-logistika salasy – ekonomikanyń qozǵaýshy kúshi, halyqaralyq bailanysty nyǵaitatyn negizgi faktordyń biri dep atap óttim. Qazaqstannyń bul saladaǵy áleýeti zor. Uly Jibek joly Qazaqstan men Ortalyq Aziia arqyly ótken. Qazaq jeri ejelden Qytai men Eýropa arasyndaǵy altyn kópir sanalady. Qytai – bizdiń máńgi, tatý kórshimiz ári senimdi odaqtasymyz. Biz bir-birimizge árdaiym qoldaý kórsetemiz. Qos halyqtyń qarym-qatynasy myzǵymas dostyqqa, ózara senimge negizdelgen. Elderimizdiń bolashaqqa degen kózqarasy – ortaq. Kóp saladaǵy yntymaqtastyǵymyz nyǵaiýda. Ásirese, «Bir beldeý, bir jol» jahandyq jobasynyń mán-maǵynasy airyqsha. Barshańyzǵa málim, 2013 jyly Tóraǵa Si Tszinpin bul bastamany Qazaqstanda jariialady. Biz osy jobany barynsha qoldaimyz, ony júzege asyrýǵa belsene atsalysyp jatyrmyz. Sebebi bul bastama elimizdiń múddesine tolyq sai keledi. «Dostyq – Moiynty» temirjolynyń ekinshi jelisi – sonyń aiqyn dáleli, – dedi Prezident.
Qasym-Jomart Toqaev Qazaqstan arqyly álemniń eń iri saýda naryqtaryna jol ashatyn 5 temirjol dálizi ótetinin aitty.
Memleket basshysynyń aitýynsha, bul – Táýelsizdik kezeńindegi eń iri temirjol qurylysy, elimiz úshin airyqsha strategiialyq mańyzy bar joba.
– Jumysshylarymyz úsh jylǵa jýyq ýaqyt boiy kúni-túni tabandy eńbek etti. Osyndai belsendi jumystyń arqasynda temirjol merziminen buryn iske qosylmaq. Muny, shyn máninde, tarihi sát deýge bolady. Bul – barshańyzǵa ortaq qajyrly eńbektiń jemisi. Bárińizdi shyn júrekten quttyqtaimyn! Zor rizashylyǵymdy bildiremin. Jańa jol júk tasymalynyń kólemin 5 ese arttyrýǵa múmkindik beredi. Sondai-aq eksporttyq taýarlardy jetkizý ýaqytyn qysqartyp, tranzittik áleýetimizdi kúsheite túsedi, – dedi Qasym-Jomart Toqaev.
Foto: Aqorda
Prezident elimizdiń búginde Eýraziiadaǵy basty tranzit habynyń birine ainalǵanyn atap ótti.
– Qazaqstan soltústik pen ońtústikti, batys pen shyǵysty jalǵap tur. Jerimiz arqyly 5 temirjol dálizi ótedi. Onyń bári álemniń eń iri saýda naryqtaryna jol ashady. Biz kólik-logistika infraqurylymyn damytýǵa basa mán beremiz. Sońǵy on jylda osy salaǵa shamamen 35 milliard dollar investitsiia salyndy. Men halyqqa Joldaýymda birqatar jobany ýaqtyly júzege asyrý týraly naqty tapsyrma berdim. Aldaǵy ýaqytta 5 myń shaqyrym temirjol salý josparlanyp otyr. Sondai-aq 11 myń shaqyrym temirjol jóndeledi. Qazir «Moiynty – Qyzyljar» temirjoly salynyp jatyr. Qyzyljar stantsiiasynan Aqtaý portyna deiingi ýchaskeler jańǵyrtylady. Bul baǵdar – Transkaspii halyqaralyq kólik baǵdarynyń basty bóligi. Munyń bári Eýropa pen Aziianyń arasyn jalǵap, Trans-Qazaqstan temirjol baǵytynyń, iaǵni Orta dálizdiń qarqyndy damýyna yqpal etedi. Jalpy, básekege qabiletti el bolý úshin ekonomikamyzdyń meilinshe qýatty bolýyna basa nazar aýdarýymyz kerek. Bul rette, kólik-logistika salasynyń orny bólek. Sondyqtan Qazaqstannyń tranzittik áleýetin arttyrý negizgi basymdyqtyń biri bolyp qala bermek. Temirjol salasynyń aldynda turǵan mindetter – aiqyn, – dedi Prezident.
Memleket basshysy aldaǵy ýaqytta bul salaǵa tsifrlandyrý jáne jasandy intellekt tehnologiiasyn engize otyryp, ony el ekonomikasynyń ozyq baǵyty retinde damytý kózdelgenine, alda áli de aýqymdy jumys turǵanyna, sol sebepti barlyq jospardy ýaqtyly, der kezinde oryndaý óte mańyzdy ekenine nazar aýdardy.
Sondai-aq telekópirde Kólik ministri Nurlan Saýranbaev, «Qazaqstan temir joly» UK» AQ basqarma tóraǵasy Talǵat Aldybergenov, «Qazaqstannyń Eńbek Eri», temir jol salasynyń ardageri Qaltai Sámbetov sóz sóiledi.
