Koronavirýs indetiniń ekinshi kezeńine daiyndyq máseleleri boiynsha keńeste Memleket basshysy Qasym-Jomart Toqaev densaýlyq saqtaý salasyn jedel tsifrlandyrýdy tapsyrdy, dep habarlaidy "Ult aqparat".
«Búginde birqatar tapsyrmany oryndaý asyra silteýshilik baiqalady. Aitalyq, «SQ-Farmatsiia» men Meditsinalyq saqtandyrý qory boiynsha qylmystyq tergeýge bailanysty densaýlyq saqtaýdy tsifrlandyrý is júzinde toqyrap qaldy. Qazirgi ýaqytta Qarjy ministrligi Qarjylyq monitoring komitetiniń qylmystyq isti tergeý jáne sotqa deiingi tekserýi aiasynda Densaýlyq saqtaýdyń integratsiialyq tuǵyrnamasyna qandaida bir ózgertýler engizýge baǵyttalǵan barlyq is-áreket toqtap tur», - dedi QR Prezidenti.
Memleket basshysynyń atap ótýinshe, qazirgi jaǵdaidaǵy integratsiialyq tuǵyrnama málimetterin tirkeý arqyly integratsiialyq tuǵyrnamany almai jáne integratsiialyq protsesterdi toqtatpai-aq qylmystyq tergeý júrgizýge tehnikalyq múmkindik bar.
«Bul memlekettik organdardyń kelisilmegen is-áreketin bildiredi. Olardyń árqaisysy vedomstvolyq múddeni aldyǵa qoiyp otyr. Ásirese qazirgi ýaqytta bul múlde jol berýge bolmaityn jaǵdai. Málimetterdi jinaý qol kúshimen júrgizilýde. Meditsinalyq uiymdar arasynda aqparat almasý, indet boiynsha tolyq tsifrlyq kartina joq. Úkimetke, Prezident ákimshiligine qysqa ýaqyttyń úshinde atalǵan problemany sheshý qajet. Buǵan qosa, meditsinany tsifrlandyrý, málimetter bazasyn integratsiialaý, úide em alyp jatqan patsientterge monitoring júrgizý júiesin qurý úshin jaýapkershilikti eshkim de alyp tastaǵan joq. Kúni keshe Tsifrlyq damý ministrin qabyldadym. Ol maǵan densaýlyq saqtaýdy tsifrlandyrýdyń jańa ádisteri týraly baiandady. Olardy is júzinde júzege asyrýǵa kirisý qajet dep sanaimyn. Jalpy, jospar jaqsy. Endi ony júzege asyrý qajet», - dedi Qasym-Jomart Toqaev.
