Qazaqstan Prezidentiniń baspasóz hatshysy Aidos Úkibai belgili sportshy Denis Tenniń qazasyn Elbasynyń qalai qabyldaǵany týraly aityp berdi.
Onyń aitýynsha, Nursultan Nazarbaev dereý Bas prokýror men Ishki ister ministrine sportshynyń qazasy týraly qylmystyq isti erekshe baqylaýǵa alýdy tapsyrǵan bolatyn.
«Memleket basshysy jas ári talantty, Qazaqstan men álemniń súiispenshiligine bólenip úlgergen, bolashaǵynan zor úmit kúttirgen Denis Tenniń baqilyq bolýyn aýyr qaiǵymen jáne zor kúizelispen qabyldady. Prezident Qazaqstanda mánerlep syrǵanaýdyń negizin qalaǵan jáne elimizdegi sporttyń damýyna zor úles qosqan Denistiń jaqyndary men týystaryna kóńil aitý jedelhatyn jiberdi», - dedi Aidos Úkibai.
Sonymen birge, Nursultan Nazarbaev jastarǵa úlgi bola bilgen tamasha uldy, óz eliniń naǵyz patriotyn tárbielep ósirgen Denis Tenniń ata-anasyna qońyraý shalyp, kóńil aitqan.
«Memleket basshysy Denistiń mezgilsiz dúnieden ótýi - jaqyndary men týystary úshin ǵana emes, tutas memleket úshin orny tolmas qaza ekenin jetkizdi. Mánerlep syrǵanaýshynyń ata-anasyna kóńil aita otyryp, Prezident qylmyskerlerdiń jazasyz qalmaitynyn basa aitty», - dedi Elbasynyń Baspasóz hatshysy Aidos Úkibai.
Aita ketsek, Qazaqstandyq mánerlep syrǵanaýshy Denis Ten 19 shilde kúni pyshaq jaraqatynan qaza bolǵan edi. Oqiǵa Qurmanǵazy Baiseiitova kósheleriniń qiylysynda 19 shildede túski saǵat 15:00 shamasynda bolǵan. Sportshy kóliginiń ainasyn urlamaq bolǵan eki adamnyń ústinen túsken. Arada bastalǵan janjaldyń saldarynan urylar Denis Tenge pyshaq suǵyp alǵan. Ol oń jaq sanynyń joǵarǵy tusyna jaraqat aldy. 25 jastaǵy Ten úsh litr qan joǵaltyp, aýrýhanaǵa óte aýyr jaǵdaida jetkizildi. Biraq Almaty qalalyq Densaýlyq saqtaý basqarmasynyń basshysy Serikbol Mýsinov qosymsha qan qajet emestigin jáne resýrstar jetkilikti ekendigin málim etken bolatyn.
2,5 saǵatqa jalǵasqan reanimatsiialyq sharalarǵa qaramastan, aýrýhana dárigerleri onyń ómirine arasha túse almady. Saǵat 17.30-da Olimpiada júldegeri qaitys boldy.
Adam óltirý babymen qylmystyq is qozǵaldy.
Búgin belgili bolǵandai, sportshynyń ólimine qatysy bar eki kúdiktiniń biri ustalyp, ol qylmysyn moiyndady. Ekinshi kúdikti - 1994 jyly týǵan Qyzylorda oblysy, Qarmaqshy aýdany, Aqai aýylynyń týmasy Arman Qudaibergenovke izdeý jariialandy.
