Foto: Aqorda
Prezident osyndai salmaqty delegatsiianyń kelýi Ortalyq Aziia men odan tysqary jerlerdegi ekologiialyq máselelerdiń sheshimin tabýdaǵy BUU-nyń rólin talqylaýǵa múmkindik beretinin atap ótti, dep habarlaidy Ult.kz.
Qasym-Jomart Toqaev Uiymnyń Óńirlik ekologiialyq sammit pen jiynnyń kún tártibin ázirleýge qosqan úlesin joǵary baǵalady.
Memleket basshysy geosaiasi turaqsyzdyq beleń alǵan shaqta klimat ózgerisi, qorshaǵan ortanyń nasharlaýy jáne sý resýrstarynyń tapshylyǵy sekildi qazirgi syn-qaterlerge qarsy is-qimyldy úilestirý óte ózekti ekenine toqtaldy.
– Qazaqstannyń tiimdi ári kópjaqty diplomatiiany qoldaitynyn jaqsy bilesizder. Qarabaiyr kúsh halyqaralyq quqyqqa ústemdik etip otyrǵan, geosaiasi ahýal ýshyǵa túsken qubylmaly kezeńde sizdermen jolyǵyp otyrmyz. Keshe osy kúrdeli máseleler jóninde egjei-tegjeili baiandadym. Halyqaralyq qoǵamdastyq muny Birikken Ulttar Uiymy men basqa da kópjaqty qurylymdar sheńberinde birlese sheshýi kerek, – dedi Memleket basshysy.
Prezident jahandyq máselelerdi sheshýde memleketterdiń kúsh-jigerin jumyldyra alatyn BUU-nyń ámbebap halyqaralyq platforma retindegi balamasyz róline nazar aýdardy. Osy oraida Uiymnyń tiimdiligi men bedelin kóterýge arnalǵan Bas hatshynyń UN80 baǵdarlamasyn qoldaitynyn taǵy da atap ótti.
Qasym-Jomart Toqaev BUU delegatsiiasynyń múshelerine elimizde ádiletti ári ornyqty memleket qurýǵa baǵyttalǵan aýqymdy reformalar iske asyrylyp jatqanyn aitty.
