Foto: Aqorda
Prezident Qasym-Jomart Toqaev aýyl ákimderiniń dialog-platformasynda sóz sóiledi, dep habarlaidy Ult.kz.
Prezident ákim – eń aldymen, halyqpen tikelei jumys isteitin memlekettik qyzmetshi ekenin, bul – óte jaýapty jumys ekenin umytpaýdy tapsyrdy. Aýyl ákimi aýyldyń bolmysyn, aýyldaǵy aǵaiynnyń ómirin jete túsinetin naǵyz isker maman bolýy kerek.
"Al aýdan ákimderin sailaýǵa qatysty ártúrli kózqaras bar. Birqatar qoǵam qairatkeri men belsendi azamattar «aýdan ákimderin sailaý qajet pe, joq pa» degen máseleni qaita qaraýdy usynýda. Bul máseleni Erlan Sairov, Albert Raý, Marhabat Jaiymbetov bastaǵan depýtattar da kóterdi.
Olar elde sailaý tym kóbeiip bara jatqanyn, jurt saiasi naýqandardan mezi bola bastaǵanyn aitýda. Bul pikirdi aýyl jáne aýdan turǵyndary da qoldap jatyr. Sailaý naýqandary jergilikti jerde júrgizilýge tiis naqty jumystarǵa kedergi keltirýi múmkin degen paiymdar da bar. Bul pikirlerdi eskergen jón", - dedi Prezident.
Ol osyǵan deiin aýdan ákimderin sailaý tásili arqyly 52 ákim sailanǵanyn atap ótti. Endi olardyń qalai jumys isteitinin qarap kórý qajet.
"Aýdan ákimin sailaýdyń tiimdi-tiimsiz tustaryn muqiiat saralaý kerek. Másele – aýdan ákimderiniń sailaýyn mindetti túrde ótkizý emes, basty maqsat: biz oń nátijelerge qol jetkizýimiz kerek.
Úkimet jáne Parlament depýtattary birlesip, osy máseleni jan-jaqty qarap, ádiletti, durys sheshim qabyldaýy qajet. Eń bastysy, árbir reforma salmaqty kózqaraspen, baiyppen jasalýy kerek", - dedi ol.
Sondai-aq Prezident aýyl ákimderi mindetti túrde bilikti maman bolýǵa tiis ekenin atap ótti.
"Qazirgi aýyl ákimderiniń 60 paiyzǵa jýyǵy osy qyzmetke alǵash ret sailandy. Bul – jergilikti bilik quramy birshama jańardy degen sóz. Alaida sailaýda jeńiske jetý – aldaǵy úlken jumystyń basy ǵana.
«Ákim boldym, toldym» dep otyrýǵa bolmaityny túsinikti. Ákimder ózderiniń myqty basshy ekenin is júzinde dáleldeýi kerek. «Basshynyń baǵy – el-jurttyń qamy» dep beker aitylmaǵan. Naǵyz elge syily ákim bolý úshin aýyldyń ahýalyn jaqsy bilý de azdyq etedi. Halyqtyń senimin aqtap, eldiń bereke-birligin nyǵaitý úshin jumys isteý kerek", - dedi Memleket basshysy.
Osyǵan bailanysty ýniversitetterde oqytylatyn «Memlekettik jáne jergilikti basqarý» baǵdarlamasyn talapqa sai ózgertýdi tapsyrdy.
"Aýyl-aimaqtardy basqarý, kóshbasshylyq qabiletti damytý máselesi nazardan tys qalǵan. Al bul jumyspen eń aldymen Memlekettik qyzmet isteri agenttigi shuǵyldanýy kerek. Quzyrly ministrlikpen birlesip, aýyl ákimderin daiarlaýǵa belsendi túrde kirisý qajet", - dedi ol.
