Qazaqstan Prezidenti Nursultan Nazarbaev Astananyń ainalasyna egilgen jasyl beldeýdi aralap, qyrǵaýyldardy erkindikke ushyrý sharasyna qatysty, dep habarlaidy QazAqparat tilshisi.
Memleket basshysy orman sharýashylyǵynyń qyzmetkerlerinen Astana mańyna kóshet otyrǵyzý jumystary qalai júrgizilip jatqanyn surady. Jumystyń igi baǵytta jalǵasyp jatqanyn kórgen Prezident bul sharýalarǵa kóńili tolatynyn bildirdi.
Osydan keiin Elbasy «Jasyl el» qatarynda qarqyndy jumys jasap jatqan jastarǵa jaqyndap, aǵash otyrǵyzdy. Aǵash otyrǵyzý barysynda Nursultan Nazarbaev jastardyń arasyndaǵy jigittiń esimin surady. «Esimim Espembet», - dep jaýap bergen jumysker stýdentke Memleket basshysy alystaǵy biik toǵaidy kórsetti.
«Anaý birinshi otyrǵyzylǵan aǵashtardy kórdiń be? Ol kezde mynadai kóshet joq bolatyn. Al myna taldar minekei - 5-7 jyldyqtar. Anaý jaiqalyp turǵan aǵashtardyń otyrǵyzylǵanyna 20 jyl ótip ketti. Qalany saldyq. Buryn qala turǵyndary qala shetine shyqsa, baratyn jer joq bolatyn. Sodan bastap 20 jyl boiy osy jerlerdi aralap kele jatyrmyn», - dedi Nursultan Nazarbaev.
Aita ketsek, Astana qalasyn jelden saqtaý úshin, halyqtyń qolaily klimatta turýyn qalyptastyrý úshin QR Prezidenti 1997 jyldyń qyrkúieginde jobany júzege asyrýdyń qiyndyǵyna qaramastan, Astana qalasynyń jasyl beldeýin qurý týraly sheshim qabyldaǵan bolatyn.
Birinshi kezeńde - 1998 jyldan bastap 2004 jyldar aralyǵynda Astana qalasynyń sheginde ornalasqan elordanyń jasyl beldeýin qurý kóshetterdi yqtyrmaaralyq keńistikterdi saqtai otyryp, orman alqaby etip otyrǵyzý jolymen júrgizildi. Osy ýaqytta birinshi kezeńniń jumysy tolyǵymen aiaqtaldy. Astananyń jasyl beldeýiniń jalpy aýdany 14 827 gektardy quraidy. Sonyń 11 502,2 gektarynda 9,6 mln aǵashtar jáne 1,8 mln shamalas butalar ósip-ónip jatyr.
Astana qalasynyń ainalasyndaǵy jasyl beldeýdi kútip ustaý maqsatynda 2005 jyly quryltaishysy elorda ákimdigi bolyp tabylatyn mamandandyrylǵan kásiporyn - «Astana ormany» quryldy. Kásiporyn bizdiń óńirdiń maýsymdylyǵy men tabiǵi-klimattyq jaǵdaiyn eskere otyryp ekpe kóshetterdi otyrǵyzý, topyraqty mehanikalandyrylǵan túrde óńdeý, túpteý jáne aǵashtar men butalardy qalyptastyrý, aýrýlarmen jáne ziiankestermen kúresý maqsatynda himiialyq óńdeý, órtke qarsy jumystar, aǵash ekpelerdi shabýdan, lastaýdan jáne taǵy da basqa buzýshylyqtardan kúzetý tárizdi keshendi agrotehnikalyq jumystardy júrgizedi.
Ekinshi kezeń jumystary 2009 jyldyń maýsymynda Qazaqstan Respýblikasy Prezidentiniń kezekti kelýinen keiin bastaldy. Onda jasyl beldeýdi orman alabyna ainaldyrý maqsaty qoiyldy. «Astana ormany» JShS jumystardy orman sharýashylyǵynyń Qazaq ǵylymi-zertteý institýtymen birlese (Shýchinsk q.) 2010 jyly bastaǵan. Al 2011 jyly bekem, ónimdiligi joǵary ártúrli aǵash túriniń orman ekpelerin qurý boiynsha ǵylymi-óndiristik tájiribelerdi jasaý júrgizildi.
2019 jyldan bastap ekinshi qabyldaýdaǵy orman ekpelerin qurý boiynsha IV kezek (jylyna 500 myń kóshet otyrǵyzý) jobasy qolǵa alynady. Jobalardyń barlyq kezekterin júzege asyrý orman qorǵaý alqaptaryn otyrǵyzýynyń yqtyrmaly tásilin orman alabyna ainaldyrýǵa, aǵash daqyldarynyń jańa uzaq ǵumyrly qylqanjapyraqty túrlerin engizýge jáne aýdandastyrýǵa múmkindik beredi.
.jpeg)