Memleket basshysy Premer-Ministr Asqar Mamindi qabyldady, dep habarlaidy Aqordanyń baspasóz qyzmeti.
Qasym-Jomart Toqaevqa elimizdegi sanitarlyq-epidemiialyq ahýal men áleýmettik-ekonomikalyq damýdyń ózekti máseleleri týraly baiandaldy.
Asqar Mamin elimizdegi sanitarlyq-epidemiialyq ahýaldyń baqylaýda ekenin jetkizdi.
Premer-Ministr Prezidentke koronaviýrsqa qarsy vaktsinalar jóninde málimet berdi. Qazirgi ýaqytta otandyq QazCovid-in vaktsinasy klinikalyq synaqtyń III satysynan ótkizilip jatyr. Onyń aldyn ala tiimdiligi 96 paiyzdy quraidy. «Spýtnik V» vaktsinasynyń sapasy attestatsiiadan ótkizilýde. Sondai-aq GMP standarty boiynsha vaktsina shyǵaratyn biofarm zaýytynyń qurylysy júrgizilýde.
Asqar Mamin Qasym-Jomart Toqaevqa 26 qańtardaǵy Úkimettiń keńeitilgen otyrysyna daiyndyq barysy jaiynda aitty. Memleket basshysynyń tóraǵalyǵymen ótetin jiynda elimizdiń áleýmettik-ekonomikalyq damý qorytyndylary men aldaǵy kezeńde atqarylatyn mindetter qaralmaq.
Kezdesý barysynda ekonomikalyq ósimdi qalpyna keltirý, investitsiia tartý, halyqty jumyspen qamtýdy qoldaý, áleýmettik mańyzy bar taýarlardyń baǵasyn turaqtandyrý jáne elimizdiń áleýmettik-ekonomikalyq damýynyń basqa da ózekti máseleleri jónindegi sharalar talqylandy.
Memleket basshysyna turǵyn úi qurylysynyń damý qarqyny týraly málimet berildi. 2020 jyldyń qorytyndysy boiynsha turǵyn úilerdi paidalanýǵa berý kólemi 16,8 paiyzǵa artyp, 15,3 million sharshy metrge jetken. Qoljetimdi baspana qurylysynyń kólemin ulǵaitý, turǵyn úi qurylysy men jalǵa beriletin turǵyn úi naryǵyna jeke investitsiialardy tartý máselelerine basa mán berilgen.
Prezidenttiń tapsyrmasy boiynsha Úkimet 2020 jyly biýdjet salasyndaǵy 883 myń qyzmetkerdiń eńbekaqysyn ósirgen. Atap aitqanda 609 myń pedagogtyń jalaqysy 25 paiyzǵa, 215 myń meditsina qyzmetkeriniń eńbekaqysy 30 paiyzǵa deiin, mádeniet, arhiv jáne óner salasyndaǵy 34 myń qyzmetker men áleýmettik qorǵaý salasyndaǵy 25 myń qyzmetkerdiń jalaqysy 50 paiyzǵa deiin kóbeigen.
Prezident biyl da biýdjet salasyndaǵy 1 million 70 myń qyzmetkerdiń eńbekaqysyn, onyń ishinde, 785 myń pedagogtyń jalaqysyn 25 paiyzǵa, 247 myń meditsina qyzmetkeriniń eńbekaqysyn 30 paiyzǵa, áleýmettik qorǵaý salasyndaǵy áleýmettik-meditsinalyq mekemelerdiń 38 myń qyzmetkeriniń jalaqysyn 45 paiyzǵa deiin arttyrý jumysyn jalǵastyrý asa mańyzdy mindet dep esepteidi.
Kezdesý sońynda Memleket basshysy Úkimetke Qazaqstannyń Eýraziialyq ekonomikalyq odaqqa biylǵy tóraǵalyq qyzmetiniń joǵary deńgeide atqarylýyn qamtamasyz etýdi mindettedi. Bul kópjaqty eýraziialyq integratsiianyń damýyna tyń serpin beredi.
