Memleket basshysy Armeniia Respýblikasynyń Premer-Ministri Nikol Pashinianmen kezdesti, dep habarlaidy "Ult aqparat" Aqordanyń resmi saityna silteme jasap.
Kezdesýde taraptar eki jaqty yqpaldastyq jáne saýda-ekonomikalyq qatynastardy odan ári damytý máselelerin talqylady.
Nursultan Nazarbaev Qazaqstan men Armeniia arasyndaǵy yntymaqtastyqtyń joǵary deńgeide ilgerilep kele jatqanyna toqtalyp, ony keńeitýdiń áleýeti jetkilikti ekenin atap ótti.
- Qazaqstan Armeniiamen árdaiym jaqsy qarym-qatynasta boldy. Elderimiz arasyndaǵy saýda ainalymy byltyr 60 paiyzǵa jýyq ósti. Bul úrdis qazir de jalǵasyn taýyp otyr. Munymen shektelmeitinimizdi atap ótkim keledi. Úkimetterimiz eki jaqty bailanystardy nyǵaitý úshin kúsh jumyldyrýy kerek. Bizdiń kompaniialarymyz eki eldiń de ekonomikasyna investitsiia quia alady, - dedi Qazaqstan Prezidenti.
Memleket basshysy eńbek migratsiiasy máselelerine jáne eki el kásipkerleri arasyndaǵy bailanystardy keńeitý qajettigine toqtalyp, ol úshin tiimdi jaǵdai jasalǵanyn atap ótti.
N.Pashinian Nursultan Nazarbaevqa kezdesýge jáne memleketaralyq bailanystardy odan ári nyǵaitý isindegi mańyzdy máselelerdi talqylaýǵa múmkindik týǵyzǵany úshin rizashylyq bildirdi.
- Ózara yqpaldastyǵymyz oń qarqyn alyp otyrǵanymen erekshelenedi. Onyń odan ári osylai ilgerilei beretinine senimdimin. Biz úshin Qazaqstanmen aradaǵy bailanys óte mańyzdy. Ekonomika sektoryndaǵy qatynastardy, sonyń ishinde investitsiialyq yntymaqtastyqty damyta túsemiz dep úmittenemiz, - dedi Armeniia Premer-Ministri.
Sonymen qatar, N.Pashinian Qazaqstan men Armeniia arasyndaǵy yntymaqtastyqty halyqaralyq uiymdar aiasynda nyǵaitýdyń mańyzdy ekenin atap ótti.
