Qazaqstan Prezidenti Aziiadaǵy ózara is-qimyl jáne senim sharalary jónindegi keńestiń V sammitine qatysty, dep habarlaidy "Ult aqparat" Aqordaǵa silteme jasap.
Memleket basshysy óz baiandamasynda Tájikstan Prezidenti Emomali Rahmonǵa qonaqjailylyǵy, Sammitti joǵary deńgeide uiymdastyrǵany jáne Prezident bolyp sailanýymen quttyqtaǵany úshin rizashylyq bildirdi. Sonymen qatar, Qasym-Jomart Toqaev Tájikstannyń Aziiadaǵy ózara is-qimyl jáne senim sharalary jónindegi keńeske tóraǵalyǵy Keńesti Aziia aimaǵyndaǵy óte mańyzdy máselelerdi sheshý isine belsendi jumyldyrýǵa septigin tigizetinin aitty.
Qazaqstan Prezidenti 1992 jyly Birikken Ulttar Uiymynda Tuńǵysh Prezident Nursultan Nazarbaevtyń Aziiadaǵy ózara is-qimyl jáne senim sharalary jóninde keńes ótkizý jónindegi usynǵan ideiasy Aziia qurlyǵynyń tarihynda jańa kezeńge jol ashqanyn aitty.
Búginde Aziiadaǵy ózara is-qimyl jáne senim sharalary jónindegi keńes – Aziia óńirindegi 35 memleketti jáne jer sharyndaǵy halyqtyń jartysyna jýyǵyn biriktirip otyrǵan tiimdi kópqyrly qurylym, – dedi Qasym-Jomart Toqaev.
Qazaqstan Prezidenti qaqtyǵystardyń órshi túskenin, qaýipsizdik mehanizmderiniń eroziiasyn, saýda jáne sanktsiialyq soǵystardy, sondai-aq, halyqaralyq terrorizmniń beleń alǵanyn atap ótip, óńirdegi qaýipsizdikke tóngen qaterdiń, ideologiialyq, etnikalyq jáne dinaralyq qaishylyqtardyń órship kele jatqanyna alańdaitynyn aitty. Osyǵan orai, ol Aziiadaǵy qaýipsizdiktiń túitkildi máselelerin sheshý úshin júieli ári keshendi ádisterdiń qajet ekenine toqtalyp, atalǵan problemaǵa bailanysty Qazaqstannyń ustanymyn jetkizdi.
– Barsha dostarymyz ben seriktesterimizdi Forýmnyń tiimdiligi men halyqaralyq básekege qabilettiligin arttyrý úshin kúsh-jiger jumyldyrýǵa shaqyramyz. Tolyqqandy óńirlik uiym bolý úshin bizge keńesti ret-retimen, birtindep transformatsiialaý qajet. Aziiadaǵy ózara is-qimyl jáne senim sharalary jónindegi keńesti institýtsionaldy túrde qalyptastyrý úshin barlyq jaǵdai jasalǵan, quqyqtyq bazasy ázirlengen, onyń turaqty qurylymdary jumys istep jatyr, – dedi Qazaqstan Prezidenti.
Qasym-Jomart Toqaev Elbasy Nursultan Nazarbaevtyń inkliýzivti damýdyń jahandyq arhitektýrasyn qalyptastyrý jónindegi «Úsh dialog» týraly bastamasynyń ózektiligin atap ótti. Memleket basshysy bul ideianyń quramdas bóligi Eýraziia aýqymyndaǵy ózara is-qimyldardyń josparyn jasaý úshin Aziiadaǵy ózara is-qimyl jáne senim sharalary jónindegi keńestiń jáne Eýropadaǵy qaýipsizdik jáne yntymaqtastyq uiymynyń, sodan keiin Aziia men Eýropadaǵy basqa da óńirlik ári kópjaqty institýttardyń áleýetteriniń sinergiiasyn qamtamasyz etý bolyp sanalatynyn aitty.
– Daýly problemalar men qarama-qaishylyqtardy bastalǵan sátinde sheshý úshin konstrýktivti kelissózderdi qamtamasyz etý – kún tártibindegi basty máselelerdiń biri. Sondyqtan, jaqyn arada Aziiadaǵy ózara is-qimyl jáne senim sharalary jónindegi keńes aiasynda halyqaralyq mediatsiiany júzege asyratyn tolyqqandy ujymdyq qaýipsizdik júiesi qurylýy ábden múmkin, – dedi Qazaqstan Prezidenti.
Qasym-Jomart Toqaev halyqaralyq lańkestikke qarsy is-qimyldar úshin birlesken júieli ádister ázirleý qajettigine arnaiy toqtaldy. Onyń aitýynsha, BUU Bas Assambleiasynyń 73 sessiiasynda qabyldanǵan jáne 82 memleket qoldaǵan lańkestikten ada, beibitshiliktiń jetistigi jónindegi minez-qulyq Kodeksi Aziiadaǵy ózara is-qimyl jáne senim sharalary jónindegi keńes keńistigindegi lańkestikten týatyn qaýiptiń aldyn alatyn usynystar ázirleýge negiz bola alady.
Sonymen qatar, Memleket basshysy Keńestiń barlyq mańyzdy baǵyttary boiynsha qatysýshy elderdiń naqty is-qimyldaryn keńeitýdiń ózektiligin atap ótip, jobalar men Forýmnyń basqa da jumystaryn qarjylandyratyn arnaiy qor qurýdy usyndy. Qazaqstan Prezidentiniń pikirinshe, Qor Aziiadaǵy ózara is-qimyl jáne senim sharalary jónindegi keńestiń Iskerlik keńesiniń jumysyn qosymsha yntalandyrýǵa jáne Keńeske qatysýshy barlyq memlekettiń ekonomikalyq igilikterine tyń serpin beredi.
Qasym-Jomart Toqaev is-qimyldardyń taǵy bir ózekti salasy retinde Keńestiń barlyq ólshemdegi jumystaryn sapaly sarapshylyq súiemeldeýdi jolǵa qoiýdy atady.
– Turaqty jumys isteitin dialogty platformany qaita qurý arqyly Aziiadaǵy ózara is-qimyl jáne senim sharalary jónindegi keńestiń taldaý ortalyqtarynyń áleýetin arttyrǵan jón. Keńestiń jumys organdaryna arnalǵan usynystardy jandandyrýǵa múmkindik beretin Ǵulamalar keńesin qurý máselesin ýaqtyly ári jan-jaqty zertteý kerek dep esepteimiz, – dedi Qazaqstan Prezidenti.
Memleket basshysy joǵaryda usynylǵan bastamalardyń júzege asyrylýy Keńeske múshe-memleketterdiń yntymaqtastyǵyn sapaly jańa deńgeige kóteretinin jáne Qazaqstannyń qatysýshy barlyq memlekettiń múddeleri úshin Aziiadaǵy ózara is-qimyl jáne senim sharalary jónindegi keńes aiasyndaǵy tolyq qandy is-qimyldarǵa daiyn ekenin atap ótti.
Sondai-aq, AÓSShK qatysýshy memleketter basshylarynyń V sammiti aiasynda Memleket basshysy Qasym-Jomart Toqaev Túrkiia Respýblikasynyń Prezidenti Rejep Taiyp Erdoǵanmen kezdesti.
Memleket basshylary ekijaqty yntymaqtastyqtyń perspektivalaryn, aimaqtyq jáne halyqaralyq kún tártibindegi máselelerdi talqylady.
Kezdesý sońynda taraptar bir-birin óz elderine memlekettik saparmen kelýge shaqyrdy.
Aziiadaǵy ózara is-qimyl jáne senim sharalary jónindegi keńeske qatysýshy memleketter basshylarynyń Besinshi otyrysynyń qorytyndysy boiynsha tiisti deklaratsiia qabyldandy.
