Memleket basshysy Qasym-Jomart Toqaev Amandyq Batalovqa Almaty oblysynyń ákimi laýazymyndaǵy jemisti qyzmeti úshin alǵys aitty, dep habarlaidy "Ult aqparat".
"Memleket basshysy Qasym-Jomart Toqaev Amandyq Batalovqa Almaty oblysynyń ákimi laýazymynda kóp jyl jemisti qyzmet atqarǵany, óńirdi damytýǵa jáne oblystyń áleýmettik-ekonomikalyq áleýetin arttyrýǵa eleýli úles qosqany úshin alǵys bildirdi", - dep jazdy prezidenttiń baspasóz hatshysy Berik Ýáli Facebook paraqshasynda.
Aita keteiik, búgin, 24 qarashada Memleket basshysynyń Jarlyǵymen Amandyq Batalov Almaty oblysynyń ákimi laýazymynan bosatyldy.
Batalovtyń qyzmet joly
Amandyq Batalov 1952 jyly 22 qarashada Ózbekstannyń Nókis qalasynda týǵan.
1975 jyly Jambyl gidromeliorativti qurylys institýtyn bitirgen.
Eńbek jolyn 1981 jyly "Almatyóńdeýqurylys" tresiniń №37 qurylys-montaj basqarmasynda aǵa proraby bolyp bastaǵan.
Ár jyldary Qazaqstan prezidenti apparatynda qurylys, ónerkásiptik qurylys materialdary bóliminiń referenti; Almaty qalasy Kalinin aýdany ákimshiligi basshysynyń orynbasary; Almaty qalasy Jetisý aýdanynyń ákimi qyzmetterin atqarǵan.
2008-2014 jyldary Almaty oblysy ákiminiń birinshi orynbasary qyzmetin atqardy.
2014-2021 jyldar aralyǵynda Almaty oblysynyń ákimi boldy.
Búgin Prezident Jarlyǵymen bul qyzmetke buǵan deiin prezident kómekshisi bolǵan Qanat Bozymbaev taǵaiyndaldy.
