Nursultan Nazarbaev Indýstriialandyrý kartasy jobalaryn tanystyrý jáne «Paryz», «Altyn sapa» syilyqtarynyń jeńimpazdaryn marapattaý rásimine qatysty, dep habarlaidy "Ult aqparat" Aqordaǵa silteme jasap.
Elbasy is-shara bastalar aldynda indýstriialandyrýdyń jáne tsifrlandyrý baǵdarlamasynyń jobalary qoiylǵan kórmeni aralap kórdi.
Indýstriialandyrý kúnine arnalǵan telekópir barysynda Memleket basshysyna indýstriialyq-innovatsiialyq damý baǵdarlamasy aiasynda júzege asyrylǵan 28 jańa joba tanystyryldy.
– Búgin biz taǵy da indýstriialandyrýdyń biylǵy qorytyndysyn jasadyq. Barshańyzdy jańa jobalardyń iske qosylýymen, jańa mamandyqtardyń paida bolýymen jáne el turǵyndarynyń jańa tabysymen quttyqtaimyn, – dedi Qazaqstan Prezidenti.
Nursultan Nazarbaev álemdegi qalyptasqan jaǵdailarǵa qaramastan, elimizde qurylymdyq ózgerister men institýtsionaldyq reformalardyń iske asyrylyp jatqanyna toqtaldy.
– Biz el ekonomikasyn ártaraptandyrý jóninde sharalar qabyldap jatyrmyz. Biznes júrgizýge qolaily jaǵdai qalyptastyrý, investitsiialyq ahýal men sot júiesin jaqsartý jóninde aýqymdy jumystar júrgizilýde. Byltyr elimizdiń Úshinshi jańǵyrýyn bastadyq. Biyl Bes áleýmettik bastamany iske asyrý jóninde jariia ettim. Qazirgi Joldaýdyń negizgi maqsaty – qazaqstandyqtardyń ál-aýqaty men turmys sapasyn arttyrý, – dedi Memleket basshysy.
Qazaqstan Prezidenti búginde elimizdiń aldynda ekonomikany odan ári ártaraptandyrý, infraqurylymdy jaqsartý jáne ónimdilikti arttyrý jónindegi aýqymdy mindetter turǵanyn atap ótti.
Nursultan Nazarbaev indýstriialandyrý baǵdarlamasy elimizdiń ornyqty jáne ártaraptanǵan ekonomikasyn qurý úderisinde negizgi ról atqaratynyn aityp, ony iske asyrý barysyndaǵy naqty nátijelerge toqtaldy.
– Biz indýstriialandyrý kezeńinde 1250 jańa kásiporyn qurdyq, sonyń ishinde 100 kásiporyndy biyl iske qostyq. 300 myńnan astam jańa jumys orny ashyldy. Búginde álemniń 110 eli Qazaqstanda shyǵarylǵan ónimdi tutynýda. Sońǵy jyldary biz buǵan deiin elimizde jasalmaǵan buiymdardyń 500-den astam túrin shyǵaryp, 50-ge jýyq jańa taýar túrin eksporttap otyrmyz, – dedi Memleket basshysy.
Qazaqstan Prezidenti shetelden kelgen investitsiianyń tórtten bir bóligi óńdeý sektoryna tiesili ekenin aitty.
Sonymen qatar, Nursultan Nazarbaev metallýrgiia, mashina jasaý, infraqurylymdyq damý jáne kólik-logistika salalarynda júzege asyrylǵan jobalar jóninde áńgimeledi.
– Biz azamattardyń joǵary turmys sapasyn qamtamasyz etý úshin meilinshe qolaily jaǵdai jasap kelemiz. «Nurly jer» baǵdarlamasy aiasynda turǵyn úi qurylysy qarqyndy júrgizilýde. Ótken jyly biz rekordtyq kórsetkishke qol jetkizdik – elimizde 11,2 millionnan astam sharshy metrdi qamtityn turǵyn úi salynyp, paidalanýǵa berildi. Biyl 12 milllion sharshy metr turǵyn úi nemese 100 myńnan astam baspana salý josparlanyp otyr, – dedi Memleket basshysy.
Sondai-aq, Qazaqstan Prezidenti ekonomikanyń túrli salalaryn tsifrlandyrý jáne birqatar kásiporynnyń óndiris úderisine innovatsiialyq sheshimderdi engizý barysyna toqtaldy.
– Tórtinshi ónerkásiptik revoliýtsiia elementterin qamti otyryp, ónerkásipti tehnologiialyq turǵydan qaita jaraqtandyrý indýstriialandyrý baǵdarlamasynyń mańyzdy quramdas bóligi sanalady. Qazaqstan ekonomikasy álemdik naryqtaǵy básekege qabilettilikti qamtamasyz etetin damýdyń túbegeili jańa modeline kóshýge tiis. Eýraziia ekonomikalyq odaǵy jáne Qytaidyń «Bir beldeý, bir jol» halyqaralyq bastamasy aiasyndaǵy qazirgi ekonomikalyq áleýetti meilinshe tiimdi paidalanyp, ony arttyrý qajet, – dedi Nursultan Nazarbaev.
Memleket basshysy indýstriialandyrýdyń úshinshi baǵdarlamasynyń strategiiasyn naqty nátijelerge baǵyttai otyryp, jan-jaqty pysyqtaý kerek ekenin atap ótti.
– 2025 jylǵa qarai eńbek ónimdiligi 1,7 ese, ónimdi eksporttaý kólemi 2,3 ese ósýge tiis. Óńdeý ónerkásibi men shikizattyq emes eksportty qoldaýǵa qosymsha 500 milliard teńge bólý jóninde tapsyrma berdim. Bul qarajat eksportqa baǵyttalǵan kásiporyndarǵa qarjylai jáne qarjylai emes keshendi qoldaý kórsetýdiń quraldaryn kóbeitýge jumsalatyn bolady, – dedi Qazaqstan Prezidenti.
Elbasy óńdeý ónerkásibiniń barlyq býynynda salalyq basymdyqtardan tiimdi óndirýshilerge qoldaý kórsetýge kóshý úderisi júrgiziletinin aitty.
– «Qarapaiym zattar ekonomikasyn» damytýdy yntylandyrý qajet. Tehnologiialyq turǵydan kúrdeli emes tutyný zattarynyń importyn almastyrýǵa kúsh jumyldyrýymyz kerek. Meniń tapsyrmam boiynsha ekinshi deńgeili bankterdiń basymdyqqa ie jobalaryn nesielendirý úshin qosymsha 600 milliard teńge bólinetin bolady, – dedi Nursultan Nazarbaev.
Sonymen qatar, Memleket basshysy eńbek ónimdiligin arttyrýdyń jáne jeke sektordy nyǵaitýdyń mańyzdylyǵyna toqtaldy.
– Ekonomikanyń naqty sektoryna ǵylymi-tehnikalyq qyzmetter nátijesin engizý jónindegi jumystardy jandandyrǵan jón. Mysaly, qazirdiń ózinde Nazarbaev Ýniversitetinde 120 ǵylymi-zertteý zerthanasy ashyldy. Ǵylymi ázirlemeler óndiristik mindetterdi sheshýdi kózdeitin naqty kásiporyndardyń tapsyrystaryna, sonyń ishinde jeke investitsiialar esebinen beriletin tapsyrystarǵa baǵyttalýǵa tiis, – dedi Elbasy.
Qazaqstan Prezidenti indýstriialyq damý úderisine «Astana» halyqaralyq qarjy ortalyǵy men IT-startaptardyń halyqaralyq tehnoparkin tartý qajettigin aitty. Bul rette, Úkimetke ártaraptandyrý jáne indýstriialandyrý máselelerin keshendi túrde sheshýge kúsh jumyldyrý júkteldi.
Is-shara sońynda Nursultan Nazarbaev «Paryz» jáne «Altyn sapa» syilyqtarynyń jeńimpazdaryn marapattady, sondai-aq biznespen ainalysýǵa qolaily jaǵdai jasaǵany úshin óńir basshylaryna arnaiy nagrada berdi.
