Prezident Qasym-Jomart Toqaev Almaty qalasynyń ákimi Erbolat Dosaevty qabyldady, dep habarlaidy "Ult aqparat".
Almaty qalasynyń ákimi Erbolat Dosaev Prezidentke biylǵy birinshi jartyjyldyqtaǵy Almaty qalasynyń áleýmettik-ekonomikalyq damýynyń aldyn ala qorytyndysy týraly baiandady. Onyń aitýynsha, atalǵan kezeńde Almatyda investitsiialyq órkendeýdiń joǵary qarqyny baiqalady.
«Negizgi kapitalǵa salynǵan investitsiia kólemi 15,8 paiyzǵa ósip, 714,8 milliard teńgege jetti. Jeke investitsiianyń kólemi 21,1 paiyzǵa ulǵaidy, onyń ishinde IT-sektorda, sondai-aq týrizm, óńdeý ónerkásibi, densaýlyq saqtaý jáne kólik salalarynda ósim bar. Jyl sońyna deiin 2 trillion teńge investitsiia tartylady dep josparlanyp otyr. 2024 jyldyń basynan beri 32,7 myń jumys orny ashyldy. Onyń 75 paiyzy turaqty jumys orny», — dep baiandady Erbolat Dosaev.
Ákim sondai-aq Qasym-Jomart Toqaevqa qoǵamdyq kólikti jańartý men ekologiialyq talaptarǵa sáikestendirý boiynsha qabyldanyp jatqan sharalar týraly málimet berdi.
«Biyl ekologiialyq taza qoǵamdyq kóliktiń úlesi 70 paiyzǵa deiin artady. Byltyr bul kórsetkish 53,7 paiyzdy quraǵan. Jergilikti biýdjet esebinen jyl sońyna deiin gazben júretin 600 avtobýs, 100 elektrli avtobýs, 112 trolleibýs satyp alynady. Sondai-aq qalanyń trolleibýs parki tolyǵymen jańartylady», — dep habarlady Almaty ákimi.
Prezidentke qalanyń joǵarǵy bóligin sýmen qamtýdyń rezervtik shemasyn jasaý jónindegi tapsyrmasynyń oryndalýy týraly baiandaldy.
«Bul baǵyttaǵy qurylys jumystary biylǵy shilde aiynda aiaqtalyp, 6 jańa uńǵyma jáne 1,5 shaqyrym magistraldyq qubyr paidalanýǵa berildi. Nátijesinde qosymsha shemanyń qýaty 60 paiyzǵa artty. Bul Medeý aýdanynyń 50 myń turǵynyn sýmen úzdiksiz qamtamasyz etýge múmkindik beredi», — dedi Erbolat Dosaev.
Erbolat Dosaevtyń aitýynsha, áleýmettik infraqurylymdy damytýǵa erekshe kóńil bólinedi. Biyl 4 meditsinalyq-sanitarlyq alǵashqy kómek ortalyǵynyń qurylysy jáne 12 emhananyń kúrdeli jóndeý jumystary aiaqtalady. Buǵan qosa, jyl sońyna deiin 11 jańa meditsinalyq-sanitarlyq alǵashqy kómek ortalyǵy men emhana qurylysynyń jobasy jasalady. Osy jyly maýsym aiynda Almaty qalasynyń Perinatologiia jáne balalar kardiohirýrgiiasy ortalyǵynda «Fetaldi hirýrgiia» pilottyq jobasy júzege asty. Bul joba elimizde alǵash ret qolǵa alynyp otyr.
Memleket basshysyna mektepterdegi oryn tapshylyǵyn azaitý baǵytynda júrgizilip jatqan jumystar jóninde aityldy. Jyl sońyna deiin jergilikti biýdjet esebinen 3,7 myń oryndyq 8 nysan paidalanýǵa beriledi. Sonymen qatar 6,4 myń oryndyq 10 jekemenshik mektep ashylady.
Prezident Qasym-Jomart Toqaev óńdeý ónerkásibin damytýǵa, sondai-aq Almaty ekonomikasyn ártaraptandyrý aiasynda shaǵyn jáne orta biznes úlesiniń ósýi esebinen kiristi odan ári arttyrýǵa basa nazar aýdarýdy tapsyrdy.
