Aldaǵy jyldan bastap koronavirýsqa qarsy tegin vaktsina egýdi bastaimyz. Bul týraly Memleket basshysy Qasym-Jomart Toqaev qazaqstandyqtardy jańa 2021 jylmen quttyqtaýy kezinde aitty, dep habarlaidy "Ult aqparat".
«Ótip bara jatqan jyl kúlli álem jurtshylyǵynyń esinde qalatyn erekshe jyl boldy. Dúnie júzi buryn-sońdy bolmaǵan alapat indetpen betpe-bet keldi. Bizdiń halqymyzǵa da onyń zardaby tidi. Osyndai qiyn kezeńde tutas ult bolyp birligimizdiń qadir-qasietin jete sezindik. Dertke shaldyqqan árbir adamnyń tezirek saýyǵyp ketýin tiledik. Biraq, indet adam talǵamaidy. Pandemiianyń saldarynan kóptegen azamattarymyzdan aiyrylyp qaldyq. Olardyń ishinde elimizdi órkendetýge zor úles qosqan tanymal tulǵalar da bar. Ómirden ótken adamdardyń imandary salamat bolsyn! Endi mundai qasiret qaitalanbasyn. Bul úshin qoldan kelgenniń bárin jasaimyz. Ár azamat memlekettiń qamqorlyǵynda bolady. Aldaǵy jyldan bastap koronavirýsqa qarsy tegin vaktsina egýdi bastaimyz. Ony azamattardyń qalaýymen, erikti túrde júrgizemiz», - dedi Prezident.
Eske salsaq, aldyn ala boljamǵa sáikes, Qazaqstanda koronavirýsqa qarsy vaktsina 65 jastan asqan, júrek-qan tamyry aýrýy, qant diabeti jáne sozylmaly ókpe aýrýlary bar táýekel tobyna kiretin adamdarǵa jáne meditsina qyzmetkerlerine salynatyn bolady. Vaktsina alatyndardyń boljamdy sany 2 347 000 adamdy quraidy.
