Memleket basshysy «Tsifrlyq Qazaqstan» memlekettik baǵdarlamasy aiasynda júzege asyrylǵan «Smart city – Aqyldy qala» zamanaýi tehnologiialardy engizý jónindegi baiqaý jobasynyń qorytyndylarymen tanysty, dep habarlaidy "Ult aqparat" Aqordaǵa silteme jasap.
Nursultan Nazarbaev atqarylǵan jumystyń mańyzdylyǵyn atap ótip, tsifrlandyrý salasynda iske asyrylyp jatqan jobalar, eń aldymen, azamattardyń turmys sapasyn arttyrýǵa, qolaily ári qaýipsiz orta qalyptastyrýǵa baǵyttalǵanyn aitty.
– Meniń tarapymnan árdaiym memleketti tiimdi basqarýdy qamtamasyz etý mindeti qoiyldy. Basqarýǵa qatysty sheshimderdiń bir ortalyqta qabyldanýy ekonomikada jaqsy nátije beredi, – dedi Elbasy.
Joba jol jáne qoǵamdyq qaýipsizdikti, sonyń ishinde bilim berý mekemeleri men áleýmettik nysandarǵa beine baqylaý júrgizý, densaýlyq saqtaý salasyna monitoring jasap, basqarý, sondai-aq ǵimarattar men turǵyn úilerdi sońǵy úlgidegi aqyldy quraldarmen jabdyqtaý arqyly qalanyń qalypty tirshiligin keshendi qamtamasyz etýge baǵyttalǵan.
Ahýaldyq ortalyq vedomstvoaralyq is-qimyldy uiymdastyrý, qalany taktikalyq jáne strategiialyq turǵydan basqarý, sonyń ishinde kommýnaldyq qyzmet kórsetý mekemelerin basqarý jónindegi sheshimdermen tanystyrý, qala resýrstary jónindegi shynaiy jáne ýaqtyly alynǵan málimetterdi jinaqtaý, qaýipsizdikti qamtamasyz etý úshin barlyq qajetti infraqurylymmen jabdyqtalǵan.
Sonymen qatar, atalǵan jobany iske asyrý barysynda energiia tiimdiligin qamtamasyz etý, ekologiialyq jaǵdaiǵa monitoring jasaý, qylmystardyń aldyn alý jónindegi innovatsiialyq tásilder engizildi. Bul elimizde aqparattyq tehnologiialardy tájiribeden ótkizip, Smart Sity tujyrymdamasyn damytý úshin Aqkól qalasynyń úlgi retindegi alǵashqy eldi meken bolýyna septigin tigizdi.
.jpeg)