Nursultan Nazarbaev Amerika Qurama Shtattarynyń Qazaqstan Respýblikasyndaǵy Tótenshe jáne Ókiletti Elshisi Djordj Krolmen kezdesti, dep habarlaidy "Ult aqparat" Aqordaǵa silteme jasap.
Memleket basshysy Nursultan Nazarbaev Djordj Kroldyń Qazaqstan Respýblikasy men AQSh arasyndaǵy ekijaqty qarym-qatynasty damytýda erekshe ról atqaratynyn aityp, búgingi kezdesý Qazaqstan Prezidentiniń Amerika Qurama Shtattaryna resmi sapary qarsańynda ótip jatqanyn atap ótti.
– 26 jyl ishinde bizdiń elderimiz arasynda ózara dostyq qarym-qatynas ornap, 70-ten astam memleketaralyq, úkimetaralyq jáne vedomstvoaralyq kelisimge qol qoiyldy, – dedi Nursultan Nazarbaev.
Kezdesý barysynda Memleket basshysy AQSh Prezidenti D.Tramppen birge strategiialyq seriktestiktiń basym baǵyttarynda, sonyń ishinde terrorizmge qarsy kúres júrgizý, iadrolyq qarýdy taratpaý rejimin nyǵaitý salasynda, sondai-aq saýda-ekonomikalyq jáne investitsiialyq yntymaqtastyq aiasyn odan ári keńeitý baǵytynda qol jetkizilgen ýaǵdalastyqtardyń mańyzdylyǵyn aitty.
– Qazaqstanda Amerika kapitalynyń qatysýymen 500-ge jýyq kompaniia jumys isteidi, solardyń 140-tan astamy – birlesken kásiporyndar. Olar taýar óndirip, ónimderin basqa elderge eksporttaýmen ainalysady, – dedi Qazaqstan Prezidenti.
Djordj Krol Qazaqstan Respýblikasyndaǵy diplomatiialyq qyzmetine joǵary baǵa bergeni úshin Nursultan Nazarbaevqa alǵys aityp, Qazaqstan Prezidentiniń aldaǵy sapary eki memleket arasyndaǵy bailanysty odan ári nyǵaita túsetinine senim bildirdi.
