Prezident Qasym-Jomart Toqaev Aqmola oblysynyń ákimi Ermek Marjyqpaevpen óńirdi damytýdyń ózekti máselelerin telefon arqyly talqylady. Bul týraly Memleket basshysynyń baspasóz hatshysy Berik Ýáli Facebook-tegi paraqshasynda jazdy, dep habarlaidy "Ult aqparat".
Memleket basshysyna oblystyń birinshi jartyjyldyqtaǵy áleýmettik-ekonomikalyq damý qorytyndylary baiandaldy. Negizgi kórsetkishter boiynsha ósimniń oń qarqyny bar ekeni atap ótildi.
Qasym-Jomart Toqaevqa koronavirýs indetine qarsy kúres boiynsha júrgizilip jatqan jumystar týraly málimet berildi. Oblysta vaktsina saldyrýǵa tiisti halyqtyń 49 paiyzy ekpe alǵan. Suranysqa ie dári-dármekterdiń eki ailyq azaitylmaityn qory ázirlengen.
Budan bólek oblys ákimi Prezidentke egin egý jáne jem-shóp daiyndaý máseleleri týraly aitty. Aýyl sharýashylyǵy daqyldary egilgen jer kólemi 5 million gektardan asady. Óńirdegi jaýyn-shashynnyń azdyǵynan Torǵai aimaǵy (Jarqaiyń, Esil, Jaqsy aýdandary) kóbirek zardap shekti. Osyǵan bailanysty kórshiles aýdandarda birlese shóp daiyndaý jumystary uiymdastyrylady.
Sonymen qatar Ermek Marjyqpaev Memleket basshysynyń tapsyrmalarynyń oryndalý barysy týraly baiandady. Atap aitqanda Qosshy aýylyna oblystyq mańyzy bar qala mártebesin berý jóninde, jylý elektr ortalyǵyn salý úshin áleýetti investorlar izdestirip jatqanyn, sondai-aq, sý basatyn aimaq turǵyndaryn kóshirý úshin Atbasar qalasynda 100 páterlik eki úidiń qurylysy bastalǵanyn jetkizdi.
Elimizdegi eleýli saiasi oqiǵa – aýyl ákimderin sailaýǵa daiyndyq barysyna erekshe mán berildi. Jalpy oblys boiynsha 95 ákim sailanady.
Áńgimelesý sońynda Memleket basshysy birqatar naqty tapsyrma berdi.
