QR Memlekettik qyzmet isteri jáne sybailas jemqorlyqqa qarsy kúres agenttigi óz qyzmetkerleri úshin ikemdi jumys kestesin engizýdi josparlap otyr. Atalǵan bastama oń nátije berse, ondai keste barlyq memlekettik organdarǵa taratylady, dep xabarlaidy QazAqparat tilshisi.
«Ózgeristerdi ózińnen basta» baǵdarlamasynyń bas menedjeri Shyńǵys Tóregeldinniń aitýynsha, jumys kestesin ózgertýge qatysty arnaiy saýalnama júrgizilgen bolatyn. Sol kezde agenttik qyzmetshileriniń 70 protsenti jumys kestesin ózgertýdi surady. Bireýler jumystyń bastalý ýaqytyn sál shegerýdi ótinse, endi bireýler túski úzilisti uzartý qajettigin jetkizdi. Osyǵan bailanysty agenttik qyzmetshileri úshin jumys ýaqytyn ózgertý týraly sheshim qabyldandy. Alaida 8 saǵattyq jumys kúni saqtalady. Sosyn atalǵan bastamany ázirshe pilottyq joba úlgisinde qolǵa alynady. «Biz mektepke deiingi jastaǵy jáne bastaýysh synypta oqityn balalary bar agenttik qyzmetshileri úshin jumys kúnin 9:30-ǵa belgileýdi usyndyq. Sonda 1,5 saǵattyq túski úzilisti sanaǵanda olardyń jumys ýaqyty 19:00-ge deiin sozylady. Sol siiaqty túski úzilisti uzartýdy suraǵandar qosymsha jarty saǵat alsa, olardyń jumys kúni de 19:00-ge deiin bolady. Qalǵan qyzmetshiler úshin qoldanystaǵy jumys kestesi (9:00-18:30) qala beredi. Atalǵan ózgerister jumys tiimdiligine kedergi jasamai, ujymdaǵy moraldyq-psixologilyq klimatqa oń áserin tigizedi dep oilaimyz. Bul bastama agenttikte, sondai-aq QR Investitsiialar jáne damý ministrliginde synaqtan ótedi. Biz ony qyrkúiek aiynda bastaimyz», - dedi Sh.Tóregeldin Astanada ótken baspasóz máslixatynda.
