Prezident tapsyrmasyna sáikes 2021 jyldan bastap sheneýnikter men memlekettik qyzmetshilerdi kezeń-kezeńimen qysqartý jumysy qolǵa alynady. Osy oraida jumyssyzdyq máselesi týyndaýy múmkin be degen suraqqa QR Prezidentiniń janyndaǵy Memlekettik basqarý akademiiasynyń vitse-rektory, professor Erkin Dúsipov jaýap berdi, dep habarlaidy QazAqparat.
«Memlekettik qyzmetshilerdi qysqartý jappai jumyssyzdyqqa alyp keledi dep aita almaimyn. Sebebi bul saiasatty baiaǵydan júrgizip kele jatyrmyz. Búginde elimizde 90 myńnan astam memlekettik qyzmetshi bar. Qysqartqan jaǵdaida biz birden jumystan shyq demeimiz, barlyǵy zań aiasynda júzege asyrylady. Qysqartýǵa ushyraǵan mamanǵa memlekettik emes nemese kvazimemlekettik uiymdardan jumys tabylýy múmkin. Jalpy memlekettik basqarý salasynda osy sekildi reformalar júrgizý ol zaman talaby jáne prezident tapsyrmasy», - dedi Erkin Dúsipov elordadaǵy «ANTIKOR ORTALYGY» -da ótken tikelei efir barysynda.
Spikerdiń aitýynsha, memlekettik qyzmetshilerdi qysqartý jumysy pilottyq joba retinde elimizdiń birneshe óńiri men organdarynda iske asyrylýda.
«Memlekettik qyzmetshilerdiń sanyn azaitý pilottyq joba retinde Nur-Sultan, Almaty qalasy jáne Mańǵystaý oblysy ákimdiginde júrgizilýde. Odan bólek, Ádilet ministrligi jáne burynǵy Memlekettik qyzmet pen sybailas jemqorlyqqa qarsy agenttik bir organ bolyp turǵan kezde iske asyryldy. Qazirgi ýaqytta barlyq sany 8 memlekettik organda memlekettik qyzmetshiniń sanyn azaitý jobasy atqarylýda», - dedi ol.
