QR Memlekettik qyzmet isteri jáne sybailas jemqorlyqqa qarsy kúres agenttigi aldaǵy meiramdar kezinde memqyzmetshilerge syilyq bermeýge keńes berdi, dep xabarlaidy QazAqparat.
Memlekettik qyzmet salasyndaǵy baqylaý departamentiniń basshysy Ravil Tiýlebaevtyń aitýynsha, Jańa jyl merekesi qarsańynda memqyzmetshilerge syilyqtar jii beriledi. Zań boiynsha memlekettik qyzmetkerge ózine júktelgen jumysy úshin kez kelgen syilyqty alýǵa tyiym salynǵan.
«Eger syilyqtyń kólemi 2 ailyq eseptik kórsetkishten (1 AEK - 2 405 teńge) tómen bolsa, onda syilyqty bergen adamǵa 200 ailyq eseptik kórsetkish (481 000 teńge) kóleminde aiyppul salynady. Al sol syilyqty alǵan memlekettik qyzmetshi 600 ailyq eseptik kórsetkishtiń (1 443 000 teńge) aiyppulyn tóleýge mindetti. Syilyqtyń baǵasy 2 ailyq eseptik kórsetkishten joǵary bolsa, onda ondai áreketter para bolyp sanalady jáne qylmystyq iske jatady», - dedi R.Tiýlebaev Astanada ótken baspasóz máslixatynda.
Resmi málimetke sáikes, aǵymdaǵy jylda zańsyz syilyqtardy usynǵany úshin 28 jeke tulǵa ákimshilik jaýapkershilikke tartyldy. Al zańsyz syilyqty alǵany úshin 5 laýazymdy tulǵa zań aldynda jaýap berdi. Olardyń barlyǵy 16,1 mln teńgeniń aiyppulyn tóleýge mindetteldi. Al astanalyq kásipker kelinshek memqyzmetkerge balans salyp beremin dep, myń dollarǵa shyǵyndaldy.
